【代糖故系列】《她被寄宿到屋邨男孩的家中》: K182

欣：「做得主播我諗實力都有返咁上下嘅，不過平時睇街場好難分有幾勁，妳總共打咗幾多場呀？」
Q：「欸…唔算多呀，五百場左右咁啦。」
欣：「明白，不過場數唔代表啲乜嘅，我就嚟五千場喇，都重係覺得唔太識玩隻game。」馬尾姐姐喺度暗笑。
Q：「咁妳一定好勁，有付出就一定有收獲。」
欣：「咁就不如而家開場試下？我都想同主播打。」
QQ當然唔會say no，順其自然下我哋三個喺一邊，另外有六個男仔就自行填返晒其餘嘅位；而我，應該阿健都係，第一次感受到十人現場開房充滿壓迫感嘅氣氛。
第一次打機咁唔想輸，作為女神嘅保鑣除咗要保護佢嘅人身安全，重應該要保護埋佢嘅聲譽，咁多人睇住絕對唔可以俾佢輸得難睇，拜託死仔健你唔好失手；呢個Yan姐亦絕對係唔講得笑嘅好撚勁，每一個技嘅控時，預判，落點同走位都唔係一個正常女仔應有嘅水準嚟，玩咗幾分鐘已經知佢勁過QQ好多…但由於我哋三個經常夾埋一齊玩，或者係運氣因素，甚至對面啲仔廢啲，呢場我哋險勝咗。
Q：「Yan姐妳好犀利呀，呢鋪純粹我哋好彩…」
有打格鬥game嘅仔都知，game上談兵往往最後會變成粗口橫飛甚至乎係真人快打，不過喺女仔嘅情況呢…
欣：「你哋三個都夾得幾好吖，女神有兩個衛兵保住實在係所向披靡，唔知得返自己一個會點呢？」




Q：「咁就…唯有靠其他人囉，唔會睇住我死掛？」
欣：「介唔介意我攞走妳一個阿健，睇下情況會點？」
健：「唔攞走David？通常我同Kuromi夾…」
欣：「乜你哋唔可以分開嘅咩？唔通有啲不可告人嘅關係？」咪老細同下屬…不過傻仔健聽到就面紅咁款。
Q：「攞走佢都可以嘅，重有呢隻嘢可以幫下我。」
欣：「不如我哋認真少少搭配，睇下會唔會精彩啲？瑩瑩雯雯，過埋嚟一齊玩吖！」然後佢又打個眼色叫埋兩個主播過嚟，連Alex都走嚟食花生。
瑩，雯：「吓？！咁我哋咪無法師玩？」
欣：「唔緊要呀，妳哋兩邊打對台，揀第二熟手嘅位。」
「OK，剩返最後我哋補位。」兩個主播咁講。
欣：「阿健你會有體育精神，唔會出賣我㗎可？」




健：「都係正常咁打啫…欣姐，妳想我點幫妳？」
欣：「唔好望住我，你當個中路法師係Kuromi，好似平時咁幫佢就得。」呢位姐姐好似想明搶人哋條仔咁。
就係咁，我呢邊中路QQ，上路我，嘉雯輔助，某仔射手，主播打野；對面中路欣姐，打野阿健，射手嘉瑩，某仔上路，主播輔助。