【代糖故系列】《她被寄宿到屋邨男孩的家中》: K183

如果講開局同關鍵位，最緊要就係打野同輔助兩個角色，嘉雯做輔助唔可以寄予厚望，而喺健仔嘅加乘下，欣姐嘅攻勢變得更加恐怖，為咗等QQ戰績唔好咁慘烈，我當然要棄路相救，最後磨下磨下我哋上下齊崩，發育不良嘅我當然抵擋唔住有健仔同主播抱團嘅欣姐猛攻，剩返我哋嘅打野主播都只可以盡可能拖延對面兵線…QQ雖然唔係死咗好多次，但就好似被完全封死，最後當然以敗北告終。
Q：「哈…欣姐果然好犀利，睇嚟我要再返屋企練下。」
欣：「唔使咁急認輸住，未必係輸喺妳度嘅，不如咁吖，除咗我哋四個之外，其餘嘅人都換邊再打多鋪吖。」
Q：「都可以嘅。」欣姐擺到明就係要同QQ講，無論點轉真相就係佢技高一籌，當然我渣過健仔亦係不爭嘅事實…即使係咁，QQ仍然保持住一貫輕鬆寬容嘅態度去應對。
雖然我唔甘心，但呢個時候亦都做唔到啲乜去補救，十人開房可以話係一種最公平嘅對決，因為完全可以溝通揀位，又唔會ban埋啲關鍵角色；而我睇得出阿健個樣都好難受，喺順風順水嘅欣姐之下佢其實無乜放水嘅空間，求祈點兩下技接個平A就可以收咗QQ人頭或者迫佢返屋企，呢種殘忍，同我要硬起心腸去拒絕Wendy實在分別不大。
今鋪我無再mark實QQ，打算顧返自己嗰路發育再嚟個突擊，點知喺八分幾鐘嗰陣QQ就俾欣姐收割再連爆兩塔，唔使再解釋你哋都會好清楚，今鋪連十五分鐘都捱唔到。至於啲嘉雯嘉瑩，又點會對個賽果有影響吖，佢哋只係遊咗幾圈，清咗小小兵線同野怪，唔知頭唔知路咁就打完一局；兩個主播當然知道乜事，贏輸早就心中有數，笑咗兩下就無再講嘢一切心照不宣。
欣：「嘩，健仔真係好犀利嘅啫，唔知嘅話以為你先係主播添呀！」佢搭落健仔膊頭講，成副大家姐咁嘅樣。
健：「欣姐唔好講笑啦，我邊識搞咁多嘢喎。」
欣：「唔係喎，如果有你拍住，可能我都可以做主播！」
健：「我邊有咁多時間…」




欣：「如果你幫我直播有人課金，我分一半畀你又點話呢？」佢用鬼魅嘅笑容望住阿健，令我諗起咗大卡車，每次佢要整蠱我嗰陣都會對住我咁笑。
阿健佢面都紅晒，作為QQ嘅廉價勞工佢唯有沉默是金。
欣：「唔講廢話嘞，不如我哋做返正經嘢，開場大亂鬥嚟虐下街客，應該無人會估到我哋咁多人坐埋一齊亂鬥。」
欣姐無再同QQ講啲乜，心底話應該就係講嚟都嘥氣，暗諷QQ未夠班呢件事在場所有人都心知肚明，而又…我唔夠勁幫QQ亦都係明顯不過嘅事情。