【代糖故系列】《她被寄宿到屋邨男孩的家中》: K193

貞：「我同佢搭N巴唔急，你兩個快啲追地鐵啦。」貞姐其實都飲咗唔少，比起欣姐癲癲哋嘅反應，我覺得佢係偏向激情嗰邊，頭先惜咗下…好似令我同佢之間產生咗啲難以言明嘅情愫，好在唔係得我同佢。
我：「咁…我哋走喇，有機會再見，bye！」
欣：「低B仔得閒陪我玩呀！咪再剩係識幫人賺錢！」
貞姐都好似無佢咁好氣，一邊撓住佢隻手，另一邊就同我哋揮手，而我就捉住健仔隻手臂拖住佢跑，雖然唔太想掂到男人，但唔扯住佢真係咪使指擬追到車。
落到地鐵站，我搶走佢個玻璃樽掉落垃圾桶，好在條友重識得自己攞銀包出嚟入閘，上到車佢就挨晒成塊面落側邊位嘅玻璃度，印晒啲面油同面紋上去…
我：「死仔包…到站喇，搭過龍無得返轉頭㗎！」
我扯佢起身落車先，然後一齊坐咗喺月台啲位度。
我：「嘩，原來黃埔開去觀塘尾班車成一點先開。」我見無聊得滯就上MTR網望下，或者記低第時會有用。
健：「做乜扯走我…我要姐姐…」
我：「姐你個頭呀！人哋同你玩咋，唔好唔記得佢哋係大學生嚟，點會show你呢個死靚仔。」




健：「咁又點呀！你夠同人玩，重惜埋人哋，黐線㗎！」
我：「點同，我哋真係玩，算得啲乜，無意思㗎。」
健：「你個仆街仔，我要話畀Queenie知！」
我：「有無無聊啲呀？咪做埋晒啲對全世界無益嘅事…」
健：「係囉，你會驚咩？你夠同女神佢kiss咗。」
我：「講乜呀你，唔好亂噏喎。」雖然唔小心俾佢知道咗我哋一齊住，但仍然唔想佢知道我哋平時嘅生活有幾荒唐，一嚟唔想佢亂諗太多，二嚟條友把口又唔太密。
健：「乜亂噏，近排有人問我你係咪喺社際足球慶功宴度嘴咗Queenie。」屌…明明嗰日所有人講過即場玩即場散，雖然我都知呢啲嘢係紙包唔住火，總會有啲仆街仔換個講法就可以令其他人get到當晚到底發生乜事。
我：「人哋亂咁傳你就信，有無咁傻仔呀，不如話我哋嗰晚成大班人喺度開群P吖，我第一個食晒文書財政呀！」
健：「空穴來風必有因…」
我：「真又好假又好，件事都過咗去就唔好再傳啦，Queenie唔鍾意㗎…而你，想溝女就諗下可以點努力啦，聽日開學又會換過晒一班同學，即係話你可以滿血復活重新嚟過㗎喇。」




健：「屌，滿血都無用㗎，一件裝都無打條毛，我唔係你呀…而且撇除四大女神外重會有啲乜嘢女呀？」
我：「我都唔知，所以希望在明天呀。」
健：「其實落雨又有乜好怕呢？」
我早知聽日班房一定充滿牛鬼蛇神，所以唯有講啲廢話氹下佢；淋完雨之後佢好似清醒返啲，我哋就一齊行出地鐵站送佢返屋企先。
我：「咪對啲姐姐咁上心呀，盞自己傷心㗎咋。」
健：「鬼唔知咩，我呢啲廢柴好有自知之明㗎喎。」
我：「聽朝見喇，快啲沖涼早啲瞓唔好病呀。」
我喺度心諗，其實我未必一定要追尾班車，咁想追嘅原因係唔希望同姐姐產生咗啲唔知乜糾纏嘅關係；好在有個傻仔喺度方便我閃人，如果得我同貞姐喺度多半又會出事，就好似Angel嗰次咁，明明人哋就有男朋友。