【代糖故系列】《她被寄宿到屋邨男孩的家中》: K194

返到屋企，個廳一早就熄晒燈，QQ瞇埋眼瞓喺張床上面攬到吉百利實一實，睇嚟已經同男朋友消耗晒啲精力。
Q：「嗯…交叉仔咁早返嚟？無同姐姐交配…」
我：「點會同人交配，人哋有仔㗎。」話時話QQ走嗰陣我都未撩姐姐，佢點知我…定係佢已經假設我…
Q：「唔會衰十一…嘻…呢個傻交叉仔嚟㗎…呼呼…」
搞乜鬼，佢到底係醒緊定瞓緊㗎？唔理，沖涼先。
上到床，啱啱洗完頭唔可以即刻瞓，有啲心緒不靈嘅我就打開咗傳說嘅工會頁面搵貞姐姐出嚟…
我：『貞姐姐，我係David…或者妳可以叫返我中文名阿爽，我知道頭先好亂嚟，而家向妳道歉，對唔住。』
貞：『你個仆街爽，諗起就想打鑊你甘！』
我：『嘩！妳咁夜重online嘅？』
貞：『越諗越嬲，想send message鬧鬼你，點鬼知一開就收到你句嘢，攪到我打咗一半都要del返。』




我：『唔使del，妳繼續鬧就得。』
貞：『算啦，我先無咁小氣，入到U重有乜未玩過。』
嗯，如果有未玩過，可能係群P大會。
我：『不過，我唔係諗住借啲意抽水惜妳㗎，嗰一刻我覺得貞姐姐妳好靚女，重好有氣質，一時忍唔住…』
貞：『頂你吖，先中四人仔講嘢就咁口甜舌滑，係邊個教你㗎？』
我：『一個今年啱啱考完DSE嘅姐姐。』
貞：『死仔包，呢啲嘢你留返嚟同佢講咪算。』
我：『我同佢已經散咗好耐，無呢個機會嚕。』
貞：『咁同你個直播女神講，唔好打攪我喇。』
我：『佢刀槍不入，講乜都唔會有反應㗎。』




貞：『好在…如果我返返去中四嗰陣，真係驚會俾你攪到小鹿亂撞撲去你心口度，睇下你點惜我。』
我：『都好在…我唔係一個大學生，如果唔係頭先一定掉低嗰兩隻怪獸，喺條街攬實妳嚟嘴。』
貞：『黐線㗎，我會嗌唔好同走人先。』
我：『但係妳已經俾我抱起到雙腳離地，個嘴亦俾我封住咗，我慢慢咁抱住妳去酒店，準備放妳落床。』
貞：『我有男朋友㗎！』
我：『識好女仔梗係要同人爭，唔爭取邊得嚟幸福。』
貞：『…』
我：『呀，好在咋，妳係大學生姐姐而我只係啱啱升高中嘅小朋友，所以我哋乜都唔係。』
貞：『我覺得，你唔會溝唔到你個女神囉。』
我：『唔係呃妳，佢唔簡單，邊有咁易溝到。』




貞：『總之唔好攪我，我唔想再蹉跎歲月，想盡快喺畢業前搵到個穩定嘅男朋友，到時出嚟做嘢就唔使諗無謂嘢。』估唔到佢係咁嘅女仔，睇樣又唔太似。
我：『即係到時偷食就得，感情免問。』
貞：『…』
我：『哎吔，講笑啫，所以我咪專登嚟同妳道歉講清楚，等妳唔好諗無謂嘢，我只會當貞姐姐妳係好朋友。』
貞：『咁我哋係咪要扮小學生咁勾手指尾講話要做成世嘅好朋友呀？』
我：『可以嘅，我唔反對。』打咗個有手指尾嘅emoji。
貞：『雖然你好離譜，但我都多謝你對我嘅認真。』
我：『唔好讚我啦，我開心得滯就會鍾意妳。』
貞：『懶得理你…聽日開學，瞓覺喇，早抖。』
同貞姐姐chat完，個腦有啲嘢諗唔係好瞓得著住；其實乜溝女有咁難咩？定係我真係太叻得滯？不過溝女叻無用㗎，搞唔掂QQ呢啲女仔，YY都同我咁講過…又，唔知傻仔健會唔會有進步呢？其實玩下玩下同女仔相處多咗就識溝㗎啦…呼嚕…