【代糖故系列】《她被寄宿到屋邨男孩的家中》: K200

嘩！掂呀！靚女！高挑身材！亮麗黑髮加紮高馬尾，重要大波！完全將隻Miss Tang比下去；上半身係純白V領雪紡荷葉邊超短袖裇衫，下面係斯文純黑透薄直身長褲，就係嗰種睇落有少少含蓄但又可以滲晒啲內在氣質出嚟嘅打扮；睇得出年紀唔係話好後生，但就保養得非常好，簡直就係完美嘅師生戀對像呀！Sorry晒鄧老師！
全班男生都俾呢位女性嘅美豔所懾服，個個變得目定口呆，至於啲女同學諗乜我就真係㞗知。
「各位同學，大家好，我將會係你哋嘅副班主任，任教嘅科目係physics，或者你哋未必認得我，就等我介紹一下自己先。」佢清爽利落咁攞枝粉筆喺黑板上面勾劃…
『X詩敏』秀麗到嚇死人嘅中文字，比傻豬豬Miss Tang有過之而無不及，呢個Miss嘅氣勢實在係非常凌厲。
而因為爛喵安排到我坐咁後嘅緣故，睇塊黑板有啲矇，喺再三警告下我實在睇唔出個姓係乜中文字嚟。
咦？我喺度講緊乜？好似撞邪咁嘅？
「請問…Miss係新老師嚟嘅？」
敏：「非也，你哋唔認得我都好正常，本身我就係一個半職教師，而且上個學年我差唔多無出現過咁滯。」
U：「我記得中一見過Miss妳，以為妳已經無再喺度教，成年無返學，Miss無事吖嘛？」
敏：「呵呵，無事呀，顧住生仔湊仔咪無返囉，多謝關心。」嘩，呢個Miss面唔紅耳唔赤咁答呢個答案出嚟，實在係太有霸氣，又係嘅，咁靚嘅Miss點可能無老公？




豬：「想請問一下半職教師係點㗎？」我都係第一次聽。
敏：「顧名思義，返一半嘅鐘數，出一半嘅糧，有一半嘅福利，所以呢，我每個禮拜大致上只會有三日係喺學校，所以如果想問我嘢嘅話，有可能要等我返工先問到，拜託你哋唔好打攪另外嗰個physics老師，我喺呢間學校只會有三個職務，就係教兩班DSE physics，做你哋班嘅副班主任，最後就係帶女同學嘅羽毛球隊，其他嘅事我係一概不聞不問，而我相信咁多位同學一定會通力合作，同Miss Tang維持好班上嘅運作，所以我呢個副班主任應該係無乜嘢做嘅…Miss Tang係一個好young嘅老師嚟，大家記得千祈千祈要惜住佢，如果俾我知道你哋有人恰佢嘅話，我係絕對唔會俾你好過嘅。」
呢個Miss唔止身材火辣，就連骨子裡嘅氣焰都咁辣…
「估唔到教我哋physics嘅竟然會係一個Miss…」
敏：「嗯，性別歧視呀，女人唔可以教physics㗎咩？」