【代糖故系列】《她被寄宿到屋邨男孩的家中》: K201

「無啲咁嘅事，只係比較少見啫。」
「我對Miss好有信心，妳當年一定係攞孖星嘅。」
對比對Miss Tang嘅質疑，大家都已經俾詩敏老師臣服咗，無論樣貌，談吐，氣質，呢個都係更高階嘅Miss。
敏：「呵呵，乜我似係考DSE嘅先生嚟咩，好開心呀！」
「唔會唔係呀？」「睇個樣應該係㗎喎…」
敏：「Sorry喎，孖就孖喇，不過係CE同A level孖A，唔知重有無人想質疑我教physics嘅能力呢？」
全班同學靜晒，就連Miss Tang都要仰望佢咁嘅樣。
敏：「係嘅，的確好少女教師教physics，我大學唔係physics major，嚟搵工嗰陣亦都唔係諗住教physics，而係想輕輕鬆鬆教maths，奈何maths啱啱請咗人，而physics就重有空缺，順水推舟之下咪照教囉，順帶一提，我CE maths同埋A level MS都係孖A，但我唔會答你哋任何數學問題嘅，大家清楚明白吖嘛。」
所有人內心都頓時產生咗敬佩仰慕讚嘆之情。
敏：「好，咁就嚟到呢度啦，如果有女仔想打羽毛球可以隨時搵我㗎，我唔喺度成年校隊好似凋零咗好多…至於男仔，唔關我事，自己去搵返你哋PE阿sir啦！」




詩敏Miss就好似一個暴風咁，吹襲完之後就迤迤然離開，Miss Tang送走佢之後就抖咗啖大氣。
鄧：「呼，讀得掂理科嘅女仔真係好得人驚…」
「係咩？呢班都有好多㗎喎。」係考第二四眼妹。
鄧：「欸…我都知，所以你哋就唔好畀壓力我啦…係呢，你哋都應該差唔多搞掂晒啲嘢，我哋重有樣正經嘢要做嘅，就係選男女班長同埋班會主席先，想問下有無人自薦？」呢啲場合睇怕就同我完全沾不上邊。
睇得多膠劇嘅你可能會以為有啲乜黨派之爭，男神書生大鬥法…事實上呢啲moment通常靜到拍烏蠅。
豬：「Miss…唔好望住我得唔得…」
鄧：「無呀…我覺得你好似做過，個樣好啱feel…」
豬：「唔好咁對我得唔得！我小學已經做過幾年喇，其實我係一啲都唔想做㗎，鄧老師你教中文應該知道以貌取人唔係一件值得推崇嘅事嚟㗎可？」
鄧：「我都明白…但班長總要搵人嚟做…我又唔係識晒你哋，最多投暗票揀人，我覺得你都幾危下。」
Miss Tang嘅控場…往往就係咁趣怪，俾佢教過都慣。




慕：「鄧老師，如果妳唔介意嘅話，我都可以擔當班長呢個職位嘅。」認頭嘅係一個公子哥兒，聽聞家境唔錯，同堆女神比我就唔知誰高誰低嘞，可能有啲人會諗住男神女神一定會行得好埋，至少都係friend，不過呢條law喺我呢級好似行唔通，據我所知前面呢四條女係唔會show佢哋嘅。