【代糖故系列】《她被寄宿到屋邨男孩的家中》: K203

豬：「你哋明唔明個問題喺邊呀？！你哋叫我出嚟做主席就易呀，又唔一次過選埋啲副主席呀，財政文書康樂呀，然後就要我周圍哀…阿哥咁，到最後又無人想做嘢…」
U：「簡單啦，叫你隔籬個friend幫你咪得囉。」
豬：「係呀，有咁易呀，妳叫得郁佢我咪做囉。」
點鬼知Uranus即刻行出位走去細龜張枱側邊…重要雙手捉住佢隻手講：「嚟吖，就幫下你好朋友啦！」
龜：「妳咁叫到…但我乜都唔識做㗎喎。」
U：「放心啦，佢會安排工作教你點做㗎喇！搞掂！」
肥豬一隻右手遮住自己雙眼，一副欲哭無淚嘅慘樣…
鄧：「最後重有個中文科長…喂！阿爽你嚟做啦，唔使你做排長做科長嘞。」
我：「我？妳肯定係我？無點錯相？」我指住自己問。
鄧：「你太無所事事，我費事你乜都唔使做。」




我：「吓…明明無所事事就係我嘅特色，係我嘅興趣，係我嘅嗜好，甚至係我嘅專業…」
鄧：「你咁多廢話中文科長啱晒你，就當罰你兀凳啦。」
「哈哈哈哈哈…哈哈哈…」
我：「咁係咪我做咗科長，就可以攞正牌兀凳？」
鄧：「你都識講唔影響到人，如果你咁鍾意兀就做埋排長啦，我一定可以滿足到你。」
我：「唔使…唔兀囉…」
搞完一大堆無聊嘢，又到咗小息嘅時間。雖然讀咗三年同大部份人都已經交過手，但大家仍然係觀察磨合緊，呢種氣氛實在有啲古怪；不過我唔多care，只係知四位女神好開心，坐埋一齊成個墟咁。
慕：「女班長，收完啲手冊要攞去校務處喇。」
U：「你係叫我做嘢？」
慕：「唔係，只係我哋身為班長應該一齊落去啫。」




U：「乜你認為三十幾本手冊有必要動用兩個人嚟搦？」
慕：「唔係嘅…既然大家都有責任咪一齊做囉。」
U：「哦，我有責任，咁我都可以搵第二個人嚟幫我負責嘅啫，既然三十幾本手冊係好重嘅話，Queenie，妳係咪可以安排妳個科長嚟幫下我呢個忙？」
Q：「重申一次，佢唔係我個乜乜乜，不過妳身為女班長叫佢做嘢就應該唔會托手踭嘅，嘻嘻…」
我同Myth你眼望我眼，一時之間都唔知點好。
慕：「唔係呢個意思，只係諗住拍埋一齊做嘢，可以多少少溝通啫。」
U：「要溝通咪直接講，如果你覺得攞嘢辛苦嘅話交晒畀我就得，我亦都唔使你陪我。」
慕：「咁…我就唔阻妳哋幾位雅興，攞啲手冊落去先。」
U：「希望你明白班長嘅責任係乜，我唔希望有任何同學喺手冊入面嘅個人資料會俾啲無謂人睇到。」