【代糖故系列】《她被寄宿到屋邨男孩的家中》: K204

慕：「呢個我當然知，女班長妳大可以放心。」
然後Myth同Louis就一齊落咗去。
Y：「妳真係無變過，係都要趕走晒啲男仔先安樂。」
U：「係咪妳啱先？我咪叫佢黐埋嚟妳度囉。」
Y：「閘住，唔使咁厚禮喎，我受唔起。」
U：「咪係囉，啲男仔有乜貢獻啫？最好全部摺埋彈開晒啦，一陣成日哄埋嚟攪到Zilvia唔開心呀。」
Z：「吖…哈…又未至於嘅…」我喺中間條罅望住佢。
Y：「喂，怕唔怕有人偷聽我哋講嘢？」
U：「乜佢唔係自己人嚟嘅咩？」呢個Uranus真係夠晒得意，呢頭可以趕走晒所有男仔，嗰頭就將我入埋落QQ數…
Q：「欸…我不願置評，亦唔會為佢嘅行為作出任何擔保同負責。」




Y：「哈哈，妳呢個女神真係抵做，零成本收隻兵返嚟，真係好難有邊個好似妳咁爽。」
Q：「啱使？Swap佢畀妳玩下囉。」
Y：「唔使，我無興趣成日有條麻煩友跟住晒。」
我：「我好眼瞓，乜都聽唔到，要落去食啲嘢，失陪先。」跟住我就去搵埋眼光光嘅健仔，本來我重懷疑緊佢會唔會有女喺隔籬就唔Q理我，但佢一見到我就即刻彈起身跟埋我落去。
琴晚玩到咁重要飲咗勁多酒唔攰就奇，就嚟連講嘢都無力，相信佢同我一樣食緊串咖喱魚蛋都唔知係乜味。
我：「喂，又會有女肯同你坐嘅？」
健：「你誤會喇…我都係好晏先起身，早你幾分鐘入課室，去到發現得返兩三個位…個女仔…思韻佢…我中二嗰陣坐過佢後面，算係謦過幾句，咪膽粗粗坐落去囉，都係一日咁大把啫。」
我：「幾好吖，咪再續情緣囉，好似幾靚女。」
健：「大佬我唔係你呀，好似只要隔籬一有女人就可以生吞活剝咁…據我所知佢有仔㗎喇。」
我：「哦，佢又會自己一個坐咁得意嘅？」




健：「係呀，我都覺得怪，咁我坐低嗰陣都驚佢有幫人霸位咪問佢係咪自己一個囉，坐低之後再問佢點解自己一個嘅，佢就話無謂提，我都唔敢再問落去。」
我：「好似好陰功咁，你彈佢過嚟同我坐囉。」
健：「你想講你咋…又同女坐我驚你個女神會發癲。」
我：「關乜嘢事啫，一早就講咗我同佢唔係嗰啲關係。」
健：「其實你早幾分鐘返嚟我哋咪會一齊坐囉。」
我：「其實你明知我哋係同學好應該坐落個吉位度等我返嚟囉，係咪先？」
健：「都唔知你返唔返學…佢一個人坐又咁礙眼，其實而家搬過嚟都無話唔得嘅…」