【代糖故系列】《她被寄宿到屋邨男孩的家中》: K230

U：「Miss妳手寫完，我幫妳打返出嚟？」
鄧：「唔好啦，我想要返傳統嘅，有得砌下…」
其實我又點會唔知Miss鍾意同我對著幹，畢竟我都係佢返工解悶嘅其中一件工具嚟，只要我唔會為佢帶嚟麻煩，佢都應該會樂意同我玩。亦即係話我嘅左女神只有為期兩天嘅食用期限…講笑啫，同QQ住咗咁耐我心入面一早就淨係得右女神，而且佢兩個咁friend，實在諗都唔敢諗。
V：「科長同學，你都幾得意，請問點稱呼呀？」
做得QQ嘅朋友，再加埋佢個樣同穿著，重有懾人嘅氣場，點都係非富則貴；但佢無好似嗰陣調完位啱啱識QQ對我嘅一面厭惡，同埋高高在上恥笑我嘅樣，而係用一對明亮嘅大眼睛帶住微笑同我講嘢。
係喎，由於仙女太迷人以致我都唔記得介紹一下佢嘅凡容…佢都係一副黑長直女主咁嘅樣，頭髮長度同以前嘅QQ差唔多，比Zilvia短，前面係平過地平線嘅齊陰瀏海，啱啱貼住條眉；個樣就比起QQ更為正統靚女，QQ塊面會圓少少攪怪啲，而佢就鵝蛋形少少，去到呢種白富美境界其實已經無乜好形容，因為只有口味，沒有高低。身型方面，著住旗袍嘅佢睇得出係一副近乎完美嘅沙漏型傳統東方女性骨架，身高矮過Zilvia少少同Uranus差唔多，心口同屁股都完勝Zilvia，女性美完勝Uranus，比起QQ多咗一份含蓄。
我：「我叫做阿爽，妳可以嗌我Xavier。」
V：「Xavier，我今日乜都未有，可唔可以借枝筆畀我？」一個眼神，一句迷人嘅聲線已經攪到我暈得一陣陣，無錯，佢把聲係可以同唔多出聲嘅Zilvia匹敵。
我當然即刻攞咗筆袋入面最似樣嗰枝三菱uni ball signo RT藍色㩒㩒筆畀佢，反正…我都無諗住要寫嘢。唔好問我點解咁隨便就嗌得出枝筆全名，可能玩得文具多…
Q：「呢個衰人嚟㗎，妳要小心啲。」




幽蘭無回應佢，只係輕輕莞爾一笑…無錯喇！我一直都唔明呢兩粒字有乜好係因為平時根本就見唔到，四大女神嗰啲根本就係奸笑，邪笑，傻笑，皮笑肉不笑，恥笑…重有唔太識笑，只有左女神呢一下先係正宗嘅莞爾。
高中上堂隔籬位坐咗個非校服旗袍美女，我諗往生之後今日嘅嘢都可以寫入我嘅生平事蹟…Miss派咗張範文概略畀我哋，啲女仔喺度寫寫寫，Miss就講到㪐㪐㩿㩿明顯未準備好，剩係思考教邊篇先都諗咗成分鐘，而我就一直陶醉緊喺女神嘅氛圍不能自拔，點聽書吖。