【代糖故系列】《她被寄宿到屋邨男孩的家中》: K233

U：「真係頂你…功課上面有名㗎嘛，攞張人名紙剔啦。」佢喺櫃桶抽咗張畀我，呢啲嘢我從來都未用過。
數數數…剔剔剔…好彩原來差細龜，而唔係其他陌生人。
豬：「喂，嚟收數呀？唔好蝦我個朋友喎！」
我：「唔係呀，收功課咋，細龜你係咪未交worksheet呀？」第一次感受追人哋功課而唔係俾人追…
龜：「嗯？我有做呀，咪交咗囉…」
我：「介唔介意搵一搵呀，我嗰邊真係無呀…」
然後佢都開始摷書包，但搵咗成分鐘結果一無所獲。
豬：「係咪你整唔見咗人哋呀，信唔信要你幫佢罰抄一張吖嗱。」
我：「抄又有乜所謂呀？都要有張吉嘅先得㗎！」
豬：「你咪幫佢抄埋題目囉，Miss應該無所謂嘅。」




龜：「呀！我記得喇…」然後佢跑咗埋嚟我位。
佢喺三十幾本閱讀理解補充入面摷咗自己嗰本出嚟再拂開，咁就有一張可憐兮兮嘅紙飄咗出嚟。
龜：「唔好意思呀，麻煩到你添…」既然一場行咗埋嚟…
我：「唔緊要啦，搵返就得…係嘞，呢位係細龜同學，上年坐過我前面，係一個…好人嚟。」我真係唔識點介紹佢，唔通話佢毒腐宅咩，結果幽蘭就喺度一頭霧水。
Q：「邊有人好似你咁介紹人㗎，玩嘢咩…」
我：「我學妳咋，妳介紹我係壞人，咁我咪介紹返佢係好人，有乜問題？」
Z：「我都同意佢係好人…」呢把聲真係好聽。
龜：「多謝Zilvia，我哋又同班喇。」細龜露出一個罕見嘅笑容，我諗佢都鍾意現實上面嘅女仔嘅。
V：「但係，你唔介意我嗌你做細龜？」
龜：「OK嘅…雖然平時好少會有人叫我…」




我：「放心啦，嗰邊重有佢隔籬位friend，係隻肥…」
呢個時候肥豬好似有後耳咁知道我講緊佢，望過嚟反手遞高拳頭對住我，係差在隻中指未應聲彈出…
我：「肥Kevin，呢班嘅班會主席。」Vienna望一望佢，含蓄嘅肥豬就只係稍微郁下隻手。
怕醜嘅細龜返返去，唔知醜嘅班長又走返過嚟。
慕：「Vienna，呢朵係畀妳嘅見面禮。」都係玫瑰啦，不過今次張紙企身啲，閃爧爧香檳金，QQ口中啲珠光紙。
Y：「點解呢張紙靚啲㗎？你一早知佢會今日嚟？」
慕：「點會喎，色紙無咁多隻色嘛，所以用呢隻…」
V：「呢朵新川崎玫瑰又摺得幾靚喎。」幽蘭放咗朵紙花喺掌心細看，而男班長聽到就彷彿龍顏大悅咁。
慕：「好感動有人嗌得出佢全名！妳重要識分新舊？」