【代糖故系列】《她被寄宿到屋邨男孩的家中》: K243

V：「呢個又唔係我嘅目的嚟…其實…妳做乜咁耐都無搵過我嘅，嚟妳樓下溜冰又撞唔到妳…」
Q：「咁中三要揀科嘛，咪專心啲溫書囉…妳夠係咯，成個暑假都無搵過我啦。」
V：「驚阻住妳拍拖嘛…同埋我成個暑假幾乎都唔喺香港，所以就唔係幾方便咁囉。」
重以為有乜唔講得，我對妳哋呢啲尷尬嘅對話無興趣囉好唔好…不過件雞真係又滑又好食，啲醬都係真材實料，同燒臘鋪啲切雞係兩個世界嚟，油飯又粒粒分明軟硬適中，絕對係汁撈飯都好過食好多垃圾餐廳例如天馬苑嗰間…
Q：「嗯，但我有嘢要問妳，做乜有協恩唔讀走咗過嚟？」協恩？個名有啲熟，似乎係名校嚟。
V：「欸…欸…其實我喺嗰邊撈唔掂…」
Q：「唔會呀…我記得妳成績都OK㗎喎，就算喺入面。」
V：「唔關成績事，只係由上年開始，我唔知點解…身邊本來熟嘅同學開始疏遠我，漸漸去到我融入唔到任何圈子嘅一個地步…」
Q：「係因為乜事，同人鬧架？反咗面？定得罪咗啲核心人物？」
V：「我唔知…我乜都無做過，個過程好慢慢…我搵唔到自己有乜問題，大家對我都重係好好禮貌同笑容，但就只係唔理我…就算我想搵人認錯同求救都無…成間學校都係女人好恐怖，我根本唔知佢哋喺後面做過啲乜…」




Q：「平時係聽得多窮人入去到會俾人蝦啫，照道理妳喺入面應該同佢哋玩得埋㗎？」
V：「初初就係嘅，但去到中三大家啲性格開始變，又或者…屋企太有錢都會係一種錯。」
Q：「應該唔會係咁樣呀…」
我：「點為之太有錢，係咪會多錢到好驚使錢？」
V：「佢聽到呢啲…真係無問題㗎？」
Q：「無問題，我話嘅…咁喺你眼中點先叫有錢吖？」
我：「欸…喺妳嘅耳濡目染下，我知道喺香港最少都要有層六七百呎嘅私樓先可以叫中產，乘返呎價就係一千萬有突，咁如果真係要有錢嘅話，起碼都要有呢個數嘅十倍，即係一兩億左右，我有無理解錯？」
Q：「基本上無，咁如果喺呢個標準上再加多兩個零呢？」加多兩個零唔識數喎，即係一百倍？一百億？！
我呆若咬雞咁含住塊雞肉望住眼前呢個高貴嘅女仔。
我：「咁誇張…屋企係上市公司嚟？」




Q：「你傻瓜，以為上市就好有錢咩，要睇持股量㗎，好多都係賣晒畀人，個老細喺入面返工㗎咋。」