【代糖故系列】《她被寄宿到屋邨男孩的家中》: K244

V：「妳唔好教壞佢啦…啲錢又唔係我嘅，同埋我屋企都有成堆人…」
Q：「但妳唔使慳都係事實，妳身上面呢條度身旗袍都要五位數啦，我講得啱唔啱先？」感覺上QQ對佢啲態度比起其他女神更加直接，唔會扮到一副可愛天真樣咁。
V：「要嘅…而家人工好貴，挨住兩萬喇，媽咪做衫嘅時候幫我做埋嘅，本身我唔想著，但佢哋話第一次見人要我著得正式啲，跟住校長又叫我直接上嚟上堂…」
我：「是但啦，對我嚟講妳哋個個都好有錢，無分別。」
Q：「唔使理佢…但點解妳會轉嚟我哋學校嘅？重要急到咁…」
V：「因為我阿爺識得呢間學校辦學團體個主席…」
Q：「咁我明喇…即係已經繞過晒所有行政步驟，校長都只係聽指示嚟安排妳喺度入讀。」
V：「可以咁講嘅，我一聽到係妳間學校就即刻話OK。」
Q：「如果妳入課室見唔到我嘅話，係咪就會轉班？」
V：「有咁諗過嘅，但可能唔同班又會有另一啲好處…而且我記得妳講過唔鍾意讀Bio。」




Q：「嗯，但既然有人事關係，點解重攪到咁趕？」
V：「本來…我爹地堅持要我返嚟原校讀中四㗎，佢話無理由有一流嘅學校都唔讀，重話中四會轉班可以識過晒啲新同學，但我知道唔會有分別…前日我喺日本機場禁區入面，一諗到落機返嚟第二日就要見返啲同學，我好唔開心跟住爆喊就匿埋咗喺廁所入面，一直喊到啲地勤final call我都唔出去，由於我係坐first class所以就驚動咗啲經理聯絡我爹地，佢聽到我喊到收唔到聲先肯放過我，重勞煩到airline個PR帶我取消出境送埋我去機場酒店。」
Q：「無事喇，以後都唔會唔開心㗎喇。」QQ坐過少少挨住幽蘭，一隻手搭落佢大髀度，睇落真係好friend。
我：「八掛一下，日本頭等機票要幾錢㗎？」
Q：「四五萬到啦，無學生價嘅…」
我：「哦，我繼續食飯…多謝晒妳啲小棠菜。」
Q：「不過…都未至於有咁嚴重呀，同埋妳係自己返嚟香港？唔係同屋企人去玩咩？」
V：「其實…我今年開始有嚴重抑鬱，亦都有睇醫生，醫生話如果換下環境等我可以靜養下會對病情有幫助，所以成個暑假佢哋就安排咗我去北海道一個渡假山莊度休養，連部電話都沒收埋我，斷絕晒啲social app…所以唔係我唔想搵妳，而係…因為我唔記得咗妳個電話號碼，所以搵唔到妳…」