【代糖故系列】《她被寄宿到屋邨男孩的家中》: K246

V：「點解呀，我哋屋企一定會包妳好食好住㗎喎…」
Q：「如果得妳自己一個住我當然會嚟搵妳，但係始終妳父母喺度，我過嚟就要同佢哋相處，我作為外人唔可以無緣無故受佢哋嘅恩惠。」
V：「妳做佢哋契女咪得囉，咁樣我同妳就真係變姐妹，我會係妳家姐？我早妳幾日出世呢，嘻嘻。」唔知有無契哥契弟空缺呢？屋企成百億生意，我去員工飯堂抹下枱落下單傳下菜應該夠我過活掛…
Q：「邊有妳諗得咁簡單喎！」
V：「試下啦，我哀下爹地媽咪佢哋應該肯㗎，佢哋又唔係唔識妳，到時我哋一定可以好開心㗎。」
Q：「邊個肯定到？如果唔開心咁點算？」
V：「就算係…都好過要住喺個男同學屋企吖，起碼我係妳女同學，咁有乜分別喎？」
Q：「唔得呀，我已經習慣咗而家嘅生活，而且過得好開心；我又唔係孤兒，爹地媽咪都重喺度㗎，加埋我已經大個女，係應該自己諗解決辦法，而唔係靠求人。」即係話…QQ第一日唔係求我收留佢，而係一早諗好咗辦法要霸佔我間屋，再色誘我等我落踏養埋佢。
V：「唔通科長佢係有錢仔嚟嘅？」
我：「Sorry，我只係一個比一窮二白好少少嘅屋邨仔。」其實喺超級富豪面前人人平等都係窮。




V：「妳點可以住喺啲咁嘅地方㗎，我唔准妳糟騭自己呀，地方又細，品流複雜，又多蛇蟲鼠蟻。」佢其實講得無錯嘅，地方細就梗，有我呢啲人咪品流複雜，只不過我屋企零食都唔多引嚟唔到啲小動物。
Q：「未至於嘅，佢公屋富戶嚟，一條友霸晒成間公屋，所以都…叫做OK嘅。」
V：「吓？！即係日日都係得妳同佢兩個！Queenie妳有男朋友㗎喇…點可以咁㗎…」
Q：「關乜嘢事喎，拍拖還拍拖，住還住㗎嘛。」
V：「但係妳明明啱啱先話佢係衰人嚟。」
Q：「係嘅…不過我氹掂咗佢，佢唔敢掂我㗎。」
V：「係咪真㗎，不過妳咁叻實搞得掂嘅。」
Q：「嗯，但係妳千祈唔好同人講呀，Yvonne佢哋都唔知㗎。」這個嘛，YY知，健仔知，韻婷知，傻豬Miss知，我驚去到最後一刻全世界都知，而個個以為得自己知。
V：「但係妳無錢可以點扮有錢女呀？」
Q：「咁我識搵錢㗎嘛，佢哋又未至於好過份嘅。」




我：「而我都俾佢打劫咗唔少…」
V：「不如以後妳啲使費我幫妳包咗佢啦！」
Q：「點得喎，我哋真心朋友嚟，錢銀傷感情呀。」
V：「咁點解妳可以打劫佢但就唔可以打劫我喎？」
Q：「因為…我同佢只係普通朋友only。」女神啲詭辯真係吖，都亂Q咁嚟嘅，但我覺得佢同左女神啲溝通模式真係有啲唔同，無乜章法，重好小學雞，呢啲就係真心？