【代糖故系列】《她被寄宿到屋邨男孩的家中》: K247

V：「咁我作為妳朋友都想幫到妳吖嘛。」
Q：「哎吔，都話我暫時搞得掂，到我真係有需要嗰陣就梗係會搵妳啦。」
V：「妳講過㗎，唔准收收埋埋一個人喺度死頂喎。」
Q：「妳先係呀，有唔開心一定要第一個同我講。」
呢兩姐妹真婆媽，但女仔婆媽又好似係天經地義。
V：「Queenie，我想食牛丸呀。」
Q：「呀，擘大口，喑。」呢兩個女仔吹水多過食嘢，我早就食完兜咖喱炒飯同三串嘢，再幫幽蘭分擔咗半份海南雞飯餐，包括六成以上嘅飯，佢只係食咗幾件雞，幾條菜同飲例湯，然後就專注mix佢嗰杯perrier溝唔知乜。
我認我廢，俾女仔助養嘅感覺其實非常良好，如果氹掂五個女神我咪星一到星五都有好嘢食？唔得喎，QQ都重係窮光蛋嚟，未至於可以請我豪食。
V：「我重煩緊食唔食藥好…」
Q：「食乜嘢藥呀？」




V：「抗抑鬱藥囉。」幽蘭喺佢個絹面刺繡珍珠綠撞白包包裡面摷咗兩包藥出嚟，佢個袋當然襯晒條裙。
我：「呢兩包嘢係乜名堂呀？」
V：「係Xanax同Setraline，都係抗抑鬱同焦慮…」我鬼識咩，識我就唔使坐喺度啦，學校教過嘅藥係得Aspirin同Paracetamol咋。
我：「妳而家好抑鬱同焦慮咩？」
V：「咁又唔係，而家呢一刻好穩定。」
我：「既然無事點解要食，退咗燒都唔使食必理痛啦。」
Q：「得唔得㗎，醫生開得比妳係應該要按時按量食。」
V：「喺嘅…醫生都係咁講，聽佢話好似好啲。」
我：「咁妳有無跟到足，有無試過食少一次會點。」
V：「有呀…試過唔記得食，亦都試過偷偷掉咗粒藥…」




幽蘭攞咗兩粒藥出嚟放咗喺個杯蓋上面品神，兩隻眼注視住一白一藍嘅丸仔，唔知嘅話可能會以為喺度問米。
我：「Share開嚟食，唔爭在啦。」我一手攞起個蓋啪落自己個口度，再一大啖zero咕嚕咕嚕飲落肚。
Q：「你係咪黐線㗎！無病無痛做乜要食人哋啲藥？！」
我：「咁人哋睇落都無病無痛，又做乜要食藥？」
Q：「你咁樣食壞你呀，黐線！」
我：「吓，藥係攞嚟醫病㗎喎，如果無病食咗會食壞人，妳肯定有病食咗就唔會食壞人？」
Q：「你都蠻不講理嘅，邊有人會好似你咁㗎？」