【代糖故系列】《她被寄宿到屋邨男孩的家中》: K248

我：「唔開心咪講出嚟囉，食咗藥就可以解決㗎喇咩？如果得嘅話我會以為呢啲係鴉片或者係大麻喎，咪等我試下食完係咪會好開心囉！總之Vienna係妳朋友即係我朋友嚟，有乜事我都可以分擔，而家我幫妳食咗啲藥喇，所以妳唔需要再諗，可以收返埋佢哋。」
V：「阿爽…科長…」
Q：「妳唔好理個黐線佬呀，佢先係有病嗰個！如果妳覺得身體有啲乜唔妥，記住要補返食藥呀…」
V：「嗯，我明㗎喇，可以放心，我重有好多藥。」
我：「明明妳就唔似病，今日睇落都好有精神同活力…」
Q：「喂，而家唔係跌親會流血呀，精神病有樣睇嘅咩？」
我：「係咪應該會無嚟精神，死下死下，唔多出聲咁。」
Q：「哈，你咁講，係咪即係覺得Zilvia有精神病呀？」
我：「有懷疑過㗎，係咪有啲乜社交恐懼症咁樣㗎？」
Q：「我同你講呀，佢都不知幾正常，係怕咗你呢啲黐線佬咋，咁我問返你，細龜係咪又似精神病吖？」




我：「吓，我覺得佢好正常喎，只係自得其樂啫，陶淵明都有講子非魚焉知魚之樂啦。」
Q：「頂你！唔識就唔好亂講啦，呢句嘢係出自莊子㗎！」（喵按：原文為子非魚，安知魚之樂？出自莊子·秋水，但實質為惠子/施所講，呢度嘅QQ顯得有啲張口就嚟，對中國文學嘅瞭解並未去到完全掌握透徹嘅程度。）
我：「如果無樣睇，唔通妳一直死頂，其實都係精神病患者嚟？」
Q：「係呀？咁我似係有乜病呀？」
我：「重使問嘅，一定係過度活躍同暴力傾…呀吖！」黐線㗎，呢條女喺枱底踢人哋上五吋下五吋都有嘅！
Q：「唔好怪我呀，我為咗醫病㗎咋！」
V：「哈哈哈…哈…你兩個真係好得意。」
我：「想問下，妳成個暑假喺日本休養，唔會好悶咩？」
V：「係無得玩電話囉…屋企人安排咗好多嘢畀我做㗎，有人嚟教我日文，花道，茶道，劍道，書法，箭藝，又去打golf同騎馬，去牧場幫手揸牛奶，摘粟米，參觀釀酒廠，學下吹玻璃…忙到我都唔得閒諗嘢。」
我：「妳好似一個暑假已經做晒其他人成世先做得完嘅嘢咁…玩模擬人生遊戲都無咁精彩。」




Q：「你羨慕唔得咁多㗎喇，繼續你嘅頹廢生活啦。」
我：「妳唔抵得我頹廢咋嘛，我打golf game嗰陣差唔多桿桿都小鳥㗎，唔好以為我唔識，重有養馬去跑…」
喺呢個時候有一隻無謂人行緊過嚟。