【代糖故系列】《她被寄宿到屋邨男孩的家中》: K261

佢無論係寫中英文定數目字都係咁靚，然後我又留意下佢啲文具，Moleskine橙色壓紋硬皮筆記，寫英文就用紫色Parker粗咀原子鋼筆，寫中文或數目字就有Pilot嘅櫻桃色半油Acro墨幼咀原子鋼筆，鉛芯筆係三菱Uni Kuru Toga Elite黑鋼版，另外重有枝三菱Uni薄荷綠Jetstream Edge點三八…俗語講得好，筆唔使多，字靚就贏。
我：「妳啲文具都幾靚㗎喎。」趁調位前講多幾句先…
V：「呀…普通啦，有啲都唔係買返嚟嘅…」
我：「呢個級數都唔使買？禮物嚟嘅…唔通男仔送？」
V：「讀女校邊有男仔，我又無出去識…屋企係做物流嘅，例如LOG-ON呢啲好多貨唔係經代理訂而係自己喺外國直接輸入就會搵我哋運輸，有時啲貨會上唔到架咁。」
係咪即係佢哋啲嘢賣咁貴就順便資助埋妳有靚嘢用？
我：「咁妳琴日又讚班長枝筆靚，呢啲嘢妳應該出句聲就要乜有乜啦。」
V：「欸，你都可以咁講嘅…但我平時唔係成日有得自己出街，好難見到佢呢啲筆，無諗住買就唔會去搵。」
我：「原來係咁，既然要乜有乜就有無都無乜所謂。」
V：「你係咪要努力讀書吖，我可以送本筆記簿畀你。」




我：「我啲字咁肉酸邊襯得起本咁靚嘅筆記喎，我自己都唔捨得，同埋…如果我哋用埋同一本筆記好似唔太好…」
佢意會到我講乜，望住我笑一笑就無再答我。
呢個世界從來都唔公平，除咗我哋手上有一部一模一樣嘅CASIO計數機，呢間絕對係良心企業嚟，因為佢無出一部純鋼鏡面拋光版計數機，等我哋呢啲貧苦學生有返啲尊嚴；正所謂數學面前，人人平等…可惜嘅係幽蘭嘅數理能力亦都係輾壓我，好似唔使諗咁寫寫寫，亦唔使改。
到咗放飯時間，五位女神好有默契咁一齊起身；我亦都好識做咁去搵返健仔，禮貌咁同思韻佢say個hi，再順便搵埋比較熟嘅肥豬同細龜。
豬：「妖，做乜黐埋嚟，乜今日唔使溫女喇咩？又做返毒撚咁可憐呀？」肥豬份人把口係有啲衰，但其實周圍嘅人都知佢係色厲內荏，實質對人係好好嘅，所以就算佢份人性格唔係好出，但大家都會樂意同佢一齊玩。
點都好，一定受歡迎過我呢個有左右女神嘅契弟先。
健：「傻啦，不朽就係毒撚嚟…至於呢隻嘢，我諗佢今日唔使服役咋掛。」
我：「我那來咁多錢同佢哋一齊食飯喎…」
豬：「係咩？乜你唔係習慣食軟飯嘅咩？」唔通我琴日食海南雞飯食得太狼死俾人唱通街，是但啦。
我：「邊有呢個資格喎，我哋一齊去食硬飯啦。」




豬：「你自己食啦，記住到時有班務嘅話你兩個要幫我手呀，個個都無人性嘅，女班長就剩係識使人做嘢，男班長就剩係諗住點溝女，對個地球都無貢獻。」
我：「搵佢就啱，我已經係排…呀，科長至啱。」
豬：「食屎啦你，科長邊有嘢做㗎，咪益咗你有功課抄。」阿健喺度暗笑，因為佢知我根本無呢個煩惱。