【代糖故系列】《她被寄宿到屋邨男孩的家中》: K262

我哋嘅飯局乏善可陳，大致上係多飯多汁再多飯。
呀，都有嘅，咪講下暑假去咗邊度玩咁囉；龜豬家境好少少所以長假點都會同屋企出去玩一轉，肥豬就去咗泰國玩水所以黑咗唔少，我就笑佢係燒燶豬或者係野豬；細龜去咗台灣不過個樣就唔多開心咁，雖然佢平時都已經無乜表情…但我諗佢只會鍾情乃木坂46而對AKB48 Team TP無乜興趣；係嘅，台灣嘅特色係茶魚飯後…咦，我講緊乜？
阿健屋企係企理啲，但暑假去玩實在太貴，所以佢通常會趁淡季攞一兩日假先去所以今個暑假就無離開過香港；至於我就返咗廣州，應該叫好過去深圳少少嘅…
食完飯，就梗係返課室吹冷氣，隔咗一陣五美返晒嚟十分之嘈，而家佢哋唔使跨課室咁走嚟走去自然就會變本加厲，彷彿每日都要開六國論大會商討下要點討伐秦國先安樂；又當然，邊有男仔敢輕舉妄動黐埋去。
V：「係喇，學校今日咪學會promotion day嘅，有無話一定要搵嘢玩㗎，你哋本身又玩啲乜？」佢望一望QY又望一望我。
開學後嘅第一個星期五就係學會推廣日，除非開學日係星四五…呢日會有人喺禮堂擺booth，會有人霸返住音樂室同家政室，會有人喺球場收靚，亦會有學會以靜制動。
Q：「我同佢，重有Zilvia主力都係音樂組。」
V：「咁妳哋喺入面玩啲乜呀？」
Q：「鋼琴…小提琴…長笛，妳鍾意可以隨時入埋嚟。」
言下之意即係話幽蘭佢絕對識樂器。




V：「嗯…暫時都…或者遲啲有需要先啦。」
我：「其實係學校嚇啲中一先話一定要搵嘢玩啫，又驚我哋太過自閉，妳嘅話參唔參加真係隨妳喜歡。」
V：「咁你又有無玩啲乜咁呀？」
我：「我係橋牌學會三年金牌會員，今年應該會係第四年…我個朋友就話要去踢足球校隊。」
V：「你打bridge㗎？我都啱喎，不如放學帶埋我去？」
我：「叫做識玩…咁啦，難得喎…好少女仔會玩bridge。」橋牌學會有無女會員？係有嘅，以前都講過係為咗避世簽完名就會唔見咗人嗰啲嚟，至於正常女仔就梗係玩bitch啦，例如YY呢啲咁，我哋學校又唔喺beach隔籬。
V：「因為我阿爺好鍾意同佢啲朋友玩，有時咪搵我去戥腳，所以我好細個就識玩㗎喇，就算同佢一齊去到外國都係打bridge多…哈哈，係咪有啲悶。」
我：「例如喺遊艇上面玩？」
V：「遊艇…golf course…club house…人哋老細房，乜都有啲啦，都係為咗去襯托下佢個image。」