【代糖故系列】《她被寄宿到屋邨男孩的家中》: K270

V：「但係我第二日返學咋喎，好多嘢都唔知道…」
席：「唔緊要㗎，我哋呢啲學會，其實妳都明係無乜嘢做，得閒嚟下就得。」所以亦唔會有乜功績…
V：「咁有乜職位㗎？唔會好似SU咁複雜㗎？」
席：「梗係唔會啦，得五六個位左右㗎咋，唔使選唔使紀錄，隨口噏阿sir得個知字就得，喂興仔你今年中四做副主好唔好呀？」
「唔使喇，我繼續做總務就得…」明知無著數嘅嘢…
席：「咁不如就妳做副主啦，其實每年最煩都係搵人簽名入會作實同埋收會費，不過今年算係特別順利…」
V：「我做無所謂嘅，但有無實質嘢要做？」
席：「呀，有一樣，每年我哋都會叫財政買返幾副新啤牌。」夠廢未？主席叫副主叫財政買牌畀總務keep。
明啦，香港嘅公務員都係咁開工，不知幾精益求精。
V：「咁請問邊位先係我哋學會嘅財政？」




席：「未搵到人喎，呀，妳叫呢條友去幫手買咪得。」
V：「哦，咁好啦，你去幫手買。」點解又關我事？
我：「喂，我無話要做嘢喎，做榮譽失踪會員就夠。」
席：「靚女叫到你就咪推啦，嗱，財政，呢度係啱啱收返嚟嘅二百四，你就買返幾副靚啲嘅牌啦，記住keep單呀，網購都得，有剩同我講繼續自己keep住，呀，上年財政剩返三十七蚊畀我，你得閒再問我攞返啦，我要去搵人先，興仔走嗰陣記得鎖門還匙，bye！」
兩嚿幾水嘅財政，都唔知夠唔夠幽蘭食餐甜品…
大家見時間咁上下都開始走人，又搞掂成年嘅課外活動。
V：「大家都咁早走嘅，你哋唔玩耐啲？」
我：「佢哋有啲係校隊，或者其他學會嘛，而且今日係星期五，好多人報完名就想快啲返屋企放假。」
V：「都係嘅，普通學校啲學生唔會咁熱血。」
我：「妳以前間學校…啲人放咗學係賴死唔肯走嘅？」




V：「睇下係乜啦，啲人好極端㗎，例如打debate嗰堆臨比賽真係會喺學校留到十一二點，有啲就剩係補習同溫書，有啲就不停出去social，不過我哋放咗學多數都有嘢做，好少話返屋企乜都唔理。」
我：「一係…我哋落去禮堂睇下其他學會點拉客？」
V：「唔啦，其實我無乜嘢係特別想玩。」
我：「或者去音樂室睇下Queenie重喺唔喺度？」
V：「唔好啦，人哋認真做嘢，唔想去阻住佢哋。」
我：「無嘢做嘅話一係返屋企先？」
V：「我同管家講好咗今日有課外活動六點完先嚟接我…想問下學校有無無人嘅地方可以坐下？」
我：「今日嘅話實有難度喎，平台cafe嗰邊實好多高form喺度，球場同操場都重應該有大把人喺度。」