【代糖故系列】《她被寄宿到屋邨男孩的家中》: K271

而佢就繼續用個楚楚可憐嘅眼神望住我，唔知佢想點。
我：「呀，有笪地方係一定無人嘅，可以跟我嚟！」
我哋學校嘅建築設計係採用N加半層式，即係本身嘅天台有一半範圍係用嚟放水箱，（車立）槽同埋一間化學實驗室；據我所知就係得咁多，唔知會唔會有啲消失嘅空間去俾人做啲唔應該嘅事情嘞。
喺後樓梯上到頂樓再上就係天台，唔上去行返中間就零舍有條樓梯係上嗰半層，呢半層本身有道永遠鎖住嘅鐵門係可以通去天台，而我哋就經過化學實驗室，再行係一個密閉空間，牆後面係水箱等等嘅嘢，喺本身嘅前樓梯位置就係廁所；嗯，但呢度嘅廁所唔同樓下正常嗰啲，嚴格嚟講係兩個迷你殘廁亦無分男女，只係勉強喺門口貼咗男左女右，聽聞上Chem Lab堂啲學生都唔鍾意用呢兩間廁所，我諗原因大家都會明嘅。
呢度係無路通返去前樓梯嘅，但佢有一條得一半闊嘅L形梯可以通去呢半層嘅天台，呢條後梯無任何窗，就連廁所同水廂位對開都無，所以係非常暗，只係靠通去真最高天台嗰道木門上嘅一個玻璃位透到小小光入嚟。
你可以想象成個L梯角係接近伸手不見五指。
我著咗男廁嘅光管打開門，一望就係馬桶跟一個觸手可及嘅洗手盤，成個空間只係合理咁容納到一個人喺度，而我就喺度搵緊某樣嘢，私煙？鹹書？震蛋？非也…
V：「呢度都幾陰森下。」佢喺門口無乜表情望住我。
我：「咁妳想要無人嘅地方嘛，所以咪…呀，你放心啦，我喺度搵緊嘢咋，唔係要妳陪我入嚟廁所，呀！我搵到喇。」我踎咗喺度喺鋅盤底搵到塊抹布。
無人會去研究呢啲乾硬咗嘅抹布乾唔乾淨，理論上佢係一塊死物，但嚴重起上嚟都可以好污糟，我做樓面執枱又點會唔明吖。然後我將佢掉落鋅盤開水再濾濕佢，加少少洗潔精，最後就係扭乾佢。




我攞咗塊濕布，閂埋廁所門同熄燈，帶幽蘭行咗上個L形嘅梯間，去到差唔多頂就抹乾淨最高嗰級樓梯嘅地面…
我：「應該唔會太污糟，妳可以坐喺度…呢度絕對唔會有人，正常嚟講。」我坐喺度再掛塊毛巾上扶手。
幽蘭聽我話坐低喺隔籬，陽光透過一方玻璃照亮我哋嘅背脊，但只要望去前面就會睇唔到大家嘅樣。
V：「如果真係有人…唔會有事㗎？」