【代糖故系列】《她被寄宿到屋邨男孩的家中》: K272

我：「如果有人嚟，我哋一定會聽到，又唔係要喺度做啲乜…正常學生如果發現呢度有人咪掉頭走人囉，最多都係情侶想上嚟惜惜啫，唔通搵我哋迫喺度打bridge？」
V：「你諗啲嘢真係好得意。」
跟住就靜咗成分鐘…我同佢唔係咁熟又唔知講乜好，唔通佢Zilvia上身拉埋把口個拉鍊唔出聲？其實我又無乜所謂啫，只係唔知佢想點，同埋Zilvia一定唔會陪我上嚟。
我：「一係我問下Queenie幾時完？完咗就叫佢搵妳？」
佢無答我，又係咁樣靜咗三十秒…唔似平時嘅佢。
V：「如果我去音樂組，Queenie就會無得彈琴…」
我：「點會喎，課外活動啫，大家輪流玩咪得。」
V：「鋼琴又唔係小提琴，鋼琴得一部…我之前間學校嘅音樂組，每年都會喺中三嘅同學入面揀一位鋼琴代表重點培養，到高中就會參加各種比賽，出席學校各種唔同嘅活動幫手伴奏，到中五就係學校嘅學生首席鋼琴代表，中六就變成輔助師妹嘅角色…而我上年爭輸咗比另一個女仔，大家都係皇家八級，佢只係多我一個ATCL。」
哦，八級我知好勁，而QQ係六級，其他一律火星話。
我：「咁返學…重有好多嘢做嘅，唔一定要彈琴。」




可憐我返咗三年學嘅重點從來都係風吹裙高見紅綠，透Bra嘅款式，重有衫袖入面嘅綠洲餘光…韻婷…
V：「我好驚Queenie會唔鍾意我…」開始聽到佢啜泣…
我：「點會喎，妳唔好亂諗啦。」
V：「對唔住，我今日都無食到藥…」
我：「無病咪唔使食囉，無事㗎喎，唔使喊。」
V：「嗚嗚…係咪連你…嗚…都唔俾我喊？」
我：「唔…唔係，妳想點咪點，如果辛苦就…食藥？」
V：「嗚嗚嗚嗚…嗚嗚嗚嗚嗚嗚…」結果佢真係喊過不停，我唔知佢到底諗緊乜，亦唔知佢點解會覺得QQ唔鍾意佢，可能佢真係有精神病…我手足無措唔知可以做啲乜幫佢，唯有靜靜咁坐喺佢隔籬陪住佢喊…好彩佢只係一個女仔，如果係男仔我驚我會有生命危險。
一開始佢慢慢咁挨住我，然後開始捉住我手臂將個頭黐落去，我見佢好似好慘咁就打側自己個身坐將佢塊面埋落我心口上面，我感覺到濕潤同埋溫暖，漸漸喺我心口化開。
點解啲女仔次次喊都會搵著我？




V：「嗚嗚…我唔鍾意自己…嗚…」
我：「如果太鍾意自己係咪會變成自戀？我諗…只要係唔憎自己都OK嘅，我覺得…喺我眼中嘅妳係好優秀，所以無必要咁諗嘅，而且妳已經轉咗學校。」
V：「但係好多人唔鍾意我，點解我要係咁樣喎…我連自己個名都唔鍾意，點解要幫我改個咁嘅名，係幽暗，係幽閉，係憂傷，係憂鬱，係憂慮，每日嘅生活係難關…」
明明佢上堂個樣係幾咁醒目，頭先打bridge重要鋒芒畢露咁大殺四方，但係而家嘅佢係幾咁無助同埋弱小…