【代糖故系列】《她被寄宿到屋邨男孩的家中》: K305

我：「咁又係，佢見到我同細龜你眼望我眼就話換組…」
Q：「唔好話佢，如果要我睇住你兩個做呢份功課都會想死…佢都係善用資源分配啫，以我哋三個實力求祈俾本小說我哋睇下，十分鐘後就可以即時演出啦，完全係浪費資源。」我又真係無資格懷疑佢哋中文嘅實力…
我：「但係要妳同Y…二汪同細龜一組會唔會唔開心？」
Q：「有乜所謂，最多咪寫埋稿畀佢講，佢唔肯講或者講得差都唔會影響到我哋兩個嘅表現，況且練習嚟啫，就算考試遇到佢呢啲同學都有方法應對。」
我：「我嘅意思係佢怪怪哋咁，驚妳哋唔鍾意啫。」
Q：「人哋內向啲唔多講嘢就話人怪，服咗你，你自己好好咩，起碼佢個樣睇落比起你更加人畜無害。」
我：「男仔嘅嘢…唔可以剩睇樣㗎，可能都係好鹹濕。」
Q：「鹹濕又點？我理得你哋喺個腦入面做緊乜吖，現實唔好攪到我哋就得，而且佢身型我哋兩個都制服到，安全過對住你好多，你唔覺㗎咩？」
我：「都係，同我一齊住其實全靠我自律…」
Q：「諗落妳媽咪保唔到我幾耐，真係要小心啲至得。」




我：「唔會㗎，Queenie…我唔會傷害妳。」
Q：「到頭嚟咪又係講個信字，唔係咩？」
我：「係嘅…妳係咪真係夠飽㗎喇，我可以再買。」
Q：「夠喇，呢半個包你嘅，幫我斟zero啦，行下街夜啲再去買特價嘢食。」原來佢一早已經諗好咗。
咁大枝zero兩杯冰底唔夠㗎，要再攞多兩杯，爽！
我：「妳話妳哋最惜Zilvia，即係呢啲嘢有分嘅咩？」
Q：「做乜關心我哋呀，想離間我哋感情呀？」
我：「點會唧，我又無著數嘅，係想知點樣排啫。」
Q：「你覺得呢，如果我哋好惜Yvonne嘅話成件事唔係好怪咩？」又好似係，就連嗰次我都係對佢夾硬嚟。
我：「但咁樣，二汪佢會唔會好慘？」




Q：「唔會嘅，我哋幾個性格都唔同，所以對住唔同人就可以有唔同嘅態度，正如有啲話題我只可以同Yvonne講唔可以同另外幾個講，就算我哋無咁惜佢都唔代表我哋唔重視佢㗎嘛，佢本身睇落就乜都自己搞得掂，就算俾仔呃都可以handle到，但另外嗰兩個…會好大鑊㗎，所以對佢哋態度有啲唔同都好正常。」
我：「嗰兩個都唔會有仔埋到身，又點會俾人呃？」
Q：「按道理就係嘅…幽蘭都係，屋企看到實。」
我：「咁妳又會唔會俾男朋友呃㗎？」
Q：「有時啲嘢…唔係用呃唔呃嚟形容嘅，你覺得佢會唔會甘心成世淨係掂過我一個女仔吖…不過而家比較係佢擔心我呃佢多啲，我唔想再煩呢個問題…」
係嘅係嘅，咁就唔好講，我都想忘記妳男友存在嘅事實。