【代糖故系列】《她被寄宿到屋邨男孩的家中》: K310

我：「邊有啲咁嘅事…係嘞，呢架車真係好好坐，不過我重以為你哋一定會用歐洲車…」我留意到架車係豐田Toyota嚟，即係全香港最普遍嘅牌子，包括九成嘅的士同埋全部小巴都係豐田嘅出品。
鍾意車嘅男仔，通常分三個派別；嗱，唔包括啲巴膠鐵膠嗰啲車呀！第一類係受日本動漫影響，開口埋口都係86同GTR，明明而家條街已經唔多覺有呢啲車；而第二類就係離地離到去摩星嶺嗰種，喺佢哋眼中除咗法拉利同林寶堅尼之外其他都係廢鐵嚟；最後第三種就係現實型，每次識到新朋友就要介紹埋爹地係揸Benz，BMW定Tesla。
咁…我都鍾意Benz嘅，但我最鍾意始終係Scania，放隻型到爆嘅鷹頭獅喺車頭上面極速送貨係一件好爽嘅事，每次到咗夜晚都要cap幾幅豔光四射霓虹logo嚟自high…
V：「歐洲車好啲咩？我好鍾意呢架Alphard㗎。」
我：「歐洲車…感覺豪華啲掛。」
V：「乜係咩？管家，係咪真係歐洲車豪華啲㗎？」
管：「呢層好難講喎…以跑車嚟講就當然歐洲車豪啲，但係佢哋無乜車廠主力生產家庭車，條生產線唔夠闊就好難做到符合經濟效用嘅高級家庭車，日本仔喺呢方面係專精，剩係Toyota已經有三到四個檔次嘅家庭車，呢架Alphard係佢哋旗艦嚟，大部份公司買老細車都會揀呢架，就算再有錢都好難搵到架好過佢，而且呢架嘢其實唔平，分分鐘拍得住歐洲SUV。」
V：「其實我架返學車值幾錢㗎？」
管：「準確嘅話要問你爹地喎，不過呢架係Alphard Hybrid嚟，重改埋原廠商務真皮座位同音響，我諗都要過百萬，真係好貴。」
V：「點呀，聽到未？」




我：「Sor…我小朋友唔識世界。」
管：「其實一架好車，最緊要安全同舒適，慳油耐用唔故障，就算壞咗都可以即刻維修，呢幾方面真係無乜車廠贏到豐田，試諗下如果畀部最靚嘅跑車你，壞咗無人識整，爆咗呔全港都搵唔到嚟換，你話幾論盡呢…」
V：「嘻，就等你體驗下做少爺仔嘅滋味啦！」
我：「我邊係喎…嘩！做乜…」幽蘭㩒我張凳側邊嘅制，個凳凭即時向後斜，隻腳重有塊板升上嚟。
V：「攤喺度瞓都得㗎，可以媲美飛機頭等艙。」
我：「咁樣…會唔會唔係幾好？」呢種感覺好頹廢，好啱我，攞埋部電話出嚟玩就一流。
V：「有乜所謂，玩下咋嘛。」
管：「不過嚟緊小姐妳又有新車坐喇。」
V：「吓！點解呀？我唔捨得部Alphard呀！」