【代糖故系列】《她被寄宿到屋邨男孩的家中》: K311

管：「放心啦，都係Alphard嚟，其實每次換款你爹地都會買最新款嘅車嚟載妳，呢部已經係由妳出世起計第三部Alphard嚟。」
V：「吓，點解我自己都唔知㗎？」
管：「上一次換車係一六年，嗰陣時妳先係小學，我諗妳無乜理過部車係點樣樣，而且真係差唔多。」
V：「咁我呢部車會點㗎，我好唔捨得佢呀。」
管：「應該會攞返公司做公司車，再用多幾年就賣…」
V：「到時要話我知呀，我唔想再無聲無息送走架車。」
做王帝女係咪好幸福？我只會唔捨得掉走部舊電腦。
幽蘭嘅屋企睇嚟真係唔遠，因為都無上過高速公路，我坐返直個人望下周圍啲街道…牛津道？乜嚟㗎，明明頭先重係經過我熟悉嘅旺角外圍，呢度應該係我用腳行到嘅範圍嚟㗎喎，點解有啲咁陌生嘅感覺，重有好多唔太高嘅屋…
好快就停咗喺一棟屋嘅前面…有道電閘，管家先生用個類似震蛋遙控咁嘅東西打開電閘駛咗架車入去。
管家先生開門放低咗我哋，自己繼續泊車。




QQ講過佢屋企係真有錢，係咩？等我睇清楚啲先…亭台，無！水池，無！所以連噴水池同小橋都係無；草地花園，無！牧場同馬房更加係無！係得躉望落應該得幾千呎嘅屋，重有另一架車泊咗喺角落頭，如果我玩賽車game啲記憶無衰退嘅話，呢架係Audi R8嚟…
唓！好叻咩，貴唔貴得過Scania S配V8引擎先？
又好似有可能貴過，因為拖頭其實係架好實際嘅車…
我豪改！全不銹鋼配置，改埋轆，冷氣櫃！實貴過你。
我：「妳屋企真係多車嘅啫。」
V：「嗰架爹地玩具嚟，有時媽咪揸咗佢架車去做嘢，佢先會開下，平時都係當擺設居多…唔好理啦，入屋先。」
佢又係用指紋嚟開鎖，我都開始慣，唔怕跌手指吖嘛…入到屋，well…門口呢個係咪叫中庭玄關設計？即係一入門個空間樓底係有兩層樓高嗰啲，天花上面有幾條透光嘅磨沙玻璃等太陽光可以射到入嚟，左手邊有條大L型樓梯可以通上二樓，樓梯用開放式設計玻璃圍封，同商場嗰啲差唔多，即係話喺樓下就可以䚎到行緊樓睇嘅女仔嘅裙底，上到去係半吊橋式設計，一邊拍牆另一邊望返落嚟。
唔錯呀下，雖然我打開機入面啲豪宅多數係中間螺旋梯，又或者Y式兩邊雲石梯，踎低可以避子彈嗰啲…