【代糖故系列】《她被寄宿到屋邨男孩的家中》: K313

我：「既然喺度打工都咁開心，作為主人家可以擁有舒適優質嘅生活，唔係應該更加開心咩？」
V：「你以為，好大壓力㗎，知唔知道有幾多人要跟住你搵食，萬一做錯決策公司蝕錢點算？你寧願自己無糧出定係大刀闊斧炒人？如果自己讀唔成書點算，到時企喺啲下屬面前佢哋個個都叻過你，真係無面到想搵窿瓹…」
馬叔叔都講過，打工隨時好過做老細，一場金融海嘯就可以令到酒樓生意唔見三四成，全包宴3388變1268，朝早啲老嘢個個食一盅廿蚊特價飯就拍拍屁股走人，海鮮無人嗌唯有賤賣或者等死；減人工？減到一成都偷笑…
我：「不過你哋係有錢人，實好犀利應付到嘅…」
V：「唔要呀，有無聽過富不過三代呀…有錢人其實唔係特別犀利，只係佢哋或者係好彩，或者好努力，或者好勇敢咁發現咗個系統，可以run到產值出嚟，你可以想象成人類本身係靠打獵為生，每日都好辛苦而且有死亡嘅風險，後來有人發明咗耕種同畜牧，佢知道點樣安排同用乜方法可以生產到最多嘅食物，於是就叫其他人嚟幫佢手打工，以後唔使再冒住生命危險打獵，咪就係咁囉。」
我：「嗯，富家女都係學霸，講嘅嘢都係特別深奧。」
V：「有乜咁深奧，中西史其實有教，農業製造咗地主階級，而工業革命就製造咗企業家階級。」
我：「欸…我諗我去到邊個年代都係做低下階層。」
V：「好似你咁懶，返到去以前實會好悽慘，一係做佃農，一係做奴隸，會無晒人權邊有得你而家咁佗佻。」
我：「咁妳買咗我啦…對我唔好太差，有飯食就得…」




V：「Uranus話你係賤骨頭真係無錯，可惜嘅係而家人人平等，有錢都唔可以買你嚟玩，如果唔係…」
我：「大小姐又想玩乜呀，我免費都可以陪下妳嘅。」
V：「你知唔知道啲貴族係擁有佃農或者奴隸嘅初夜權㗎？」
我：「乜有啲咁嘅嘢…但我一早玩爛咗喇喎。」
V：「未經主人准許私通係可以招致殺身之禍㗎。」
我：「真係殘忍…啲有錢人要咁多初夜嚟把托，無鬼聊。」
V：「以前係咁㗎啦，王帝後宮三千想殺邊個就邊個。」
有錢人都係心理變態，繼鍾意玩黐線遊戲嘅YY之後，又嚟多個抑鬱女暴君；但如果返到去嗰個年代，我可能可以serve得佢哋幾好，我自覺有呢方面嘅潛質。
俾幾個女帝寵幸，然後等佢哋爭個妳死我活。
幽蘭喺書包攞咗張上面啲字密密麻麻嘅紙出嚟，放咗喺枱面畀我睇，一望就知係佢秀麗嘅手稿嚟。




V：「嗱，你睇咗佢先再消化下，我而家上去換衫…我好快落嚟，你喺度坐定定唔好周圍亂走呀下。」