【代糖故系列】《她被寄宿到屋邨男孩的家中》: K316

V：「所以好羨慕佢，不過我諗佢屋企以前都咁上下。」
我：「有乜好羨慕佢喎，佢而家邊有咁豐富。」
V：「但係佢食得開心吖嘛，你唔覺得富家女落難流落街頭，然後有個男仔照顧佢係一件好浪漫嘅事嚟咩？」
我：「點會喎，我只係咁啱有能力…幫助下有需要嘅同學咋嘛。」
V：「係鬼，Queenie有得食你整嘅嘢，個樣不知幾咁幸福。」
我：「妳都有Florence整嘢畀妳食，佢實專業過我。」
V：「我由出世已經係咁，重點會有感覺喎。」
我：「或者妳可以叫Queenie過嚟幫妳清下雪櫃，妳一定會見到佢更加幸福個樣囉。」
V：「唔覺喎，嗰日整完頭髮我有邀請佢嚟我屋企食晚飯，但佢話要返屋企食妳整嘅嘢。」
我：「我諗…佢只係唔好意思要妳為佢付出咁多啫。」




V：「咁點解佢就可以對你予取予求，明明你就要死慳死抵重要返工嚟照顧佢，咁唔係好浪漫咩？」
呢個女仔到底攪乜，其實佢係抑鬱定係戀愛腦，點解QQ啲朋友可以咁有特色，全部有錢但性格就大相逕庭？
我唔知點答佢好，唔通同佢講QQ有份幫我解決性需要嚟回報我咩，就算…啜過佢奶都唔應該亂講嘢…好似好啲。
我：「浪漫呢啲嘢，自然有佢男朋友負責㗎啦。」
V：「你諗下佢幾多時間對男朋友，幾多時對住你？」
我：「欸…雖然係咁講…」其實佢條仔又…唔知嘞。
V：「佢梗係同你住埋一齊好開心先會繼續落去㗎啦，你話係咪先，如果可以同佢交換嚟試下就好，我可以體驗下佢而家嘅生活，佢又可以過返富家女日子。」
我：「傻嘅咩，有大屋住，雪櫃要乜有乜，做乜要嚟同我捱喎，貪過癮咩…」
V：「Queenie同你住呢段日子，有無發生好多有趣嘅事，製造咗好多難忘嘅回憶同真摯嘅笑容吖？」
我：「咁…又的確係有嘅。」




V：「咁係咪開心過我日日困喺間周度都係cam嘅屋，對住一部由細到大都一模一樣嘅雪櫃吖，我問你喇，而家我俾你任食啲MOVENPICK，乜味都有，真心開心？」
我：「如果係以前嘅話…」真心唔識答佢，雖然我係細路仔，可以任食高級雪糕好開心，但點都開心唔過我親自買返屋企喂QQ，甚至係帶酒樓剩返嘅布甸返去。
呢個時候廚房嘅後門開咗，Florence拉咗㗎買餸車入嚟，打斷咗我哋嘅對話。
工：「同學仔肚唔肚餓？不如煮下午茶畀你哋食？」