【代糖故系列】《她被寄宿到屋邨男孩的家中》: K317

我：「呢層…我又未至於肚餓嘅。」我唔識應對呢啲場合，平時都無人理我嘅…答好呀好似為食細路仔咁，如果推咗佢又驚人誤會我唔接受好意，重點係我未餓。
未餓嘅原因係我邊有多餘錢食咁多餐，中午一定嗌多飯。
V：「唔使客氣喎，想食乜嘢就直接講啦，就算嗌星洲炒米都得㗎，可以試下Florence嘅手藝。」
我：「麻煩到人唔係幾好嘅，簡簡單單就得，妳話事啦。」我驚話想食和牛西冷呢度都有得提供…
但我知道乾炒牛河唔會有，再豪華嘅家庭都唔會常備新鮮河粉，即係韻婷嗰次仆去買嗰啲…
V：「咁麻煩妳整啲點心吖，唔使太多，我哋去做功課先！」然後我哋又行返條長走廊去工作間。
佢放張稿落部迷你影印機度，真係方便…唔使喺文具鋪開鋪時間跑落街之餘，重唔使俾啲謀人寺硬掘兩蚊一張。
我：「唉，又有一樖樹受到傷害嘞。」
V：「一人一張好合理啫。」妳唔係應該倒背如流嘅咩？
我：「可以share一齊睇㗎啫。」




V：「咁我咪要同你迫埋一齊睇？」
我：「原來妳會介意同我迫埋一齊…」
V：「你係咪唔記得有cam影住？唔好咁大聲添呀，錄到音㗎…」
於是乎我哋兩個就夾角咁坐，開始練習下份稿。
其實係我練習啫，佢實力喺QQ之上練嚟都係做樣。
我：「你呢個不知所謂嘅女人，重記唔記得…妳曾經同我講過嘅嘢，點解可以咁無口齒，妳實在係太卑鄙…」
V：「喂，唔係要你讀書呀，呢篇唔係課文嚟。」
我：「Sor，一時望住啲字就…係咪要好似話劇咁？」
我攞住佢親手寫嗰張，啲字靚到我入晒迷。
V：「可以咁講嘅，但話劇有表情動作，而家唔使。」




我：「妳睇下妳自己！照下塊鏡望下呢個…放蕩嘅女人，係幾咁下賤呀？就好似路邊啲…乞兒…」
V：「做乜講到窒下窒下咁㗎…」
我：「啲對白實在係太激，我唔係幾handle到。」嗰陣時囉嚟鬧派帽畀我嘅細蚊就得嘅，但對住千金小姐…
V：「就係啲對白感情豐富，先表現到我哋嘅說話技巧㗎嘛，如果唔係邊有感染力同埋故事氛圍？」
大佬…唔係，大千金，可唔可以俾我扮大灰狼謴Q小紅帽笑騎騎放毒蛇啲語氣就算？
就係咁，試咗幾次佢都唔係幾滿意，雖然係意料之內…
工：「兩位，啲食物準備好喇，可以過去廚房食。」
V：「唔該晒，我想同佢上天台坐下！」
喺佢屋企當然佢話晒事，我乖乖地跟住佢就得。
V：「哎，你做酒樓嘅，就幫我手攞上去啦。」