【代糖故系列】《她被寄宿到屋邨男孩的家中》: K335

V：「屋企啲剩餘物資嚟囉，我見用得著咪攞過嚟。」
我：「啲牌張張唔同大細咁奇怪嘅？」
V：「哎吔，你條友仔到底有無打過橋牌㗎…」
我：「講真無乜，我係為咗簽參加學會㗎咋。」
不過有幽蘭喺度得閒打下橋牌都好嘅，有時鍾唔鍾意玩一樣嘢唔係睇嗰樣嘢本身，而係睇有乜嘢人同你一齊；佢本身就精於呢個遊戲，又可以明正言順咁逃離一陣屋企嘅控制，見到佢開心我就覺得安樂。
代價就係我同QQ會見少咗陣，或者唔知佢去咗攪乜，可能去搵瘟神，可能去拍個短拖，可能約咗其他八婆，可能專注喺佢啲業務上面，不過我都控制唔到佢嘅；而佢亦都好奇怪點解咁短時間我就可以同幽蘭變得咁熟，我都唔知點答佢好，唔通話因為有相同興趣咩…
席：「嘩，乜咁大手筆呀！係全套bidding box！」
V：「與其放喺屋企漚銹，不如攞返嚟畀大家用吖嘛。」
席：「好感動呀，呢度係幾年嘅會費嚟㗎喇，終於唔使靠寫喺張紙度…話時話死仔你買咗啤牌未呀？」
我：「急乜鬼喎，又唔係無牌用…」




V：「如果你有需要嘅話其實我可以攞一條過嚟。」聽到未呀？人哋買私煙就話買一條啫，估唔到大小姐啲備用啤牌可以用一條嚟計，唔知係單車牌定蜜蜂牌呢？
席：「唔使喇，副主席妳已經好大貢獻…如果你條友仔膽敢吞咗嗰兩嚿幾水，我實打死你！」
對於呢個全仔學會嚟講，多咗個大美女就梗係不得之了，當然有好多人對佢虎視眈眈，但幽蘭比起QQ黐得我更加實，所以佢哋都無從入手，試過有男仔走嚟撩佢謦欬，例如問佢做乜會轉校嚟呢度，得到嘅回答係官腔到嚇死埋我，乜嘢屋企人安排，唔清楚大人啲關係等等…問佢有乜嘢興趣，就係打橋牌同讀書…而鍾意食乜呢，佢話最鍾意同茜旎加埋佢啲女仔friend食，食物唔重要。
乜妳唔係戀愛腦嚟㗎咩？啲茶花女去咗邊？奇奇怪怪…
打完一陣啤，我同佢又會例牌謦下欬先送佢走。
我：「無聽過妳話補習嘅？定係平時放咗學日日去變咗生活嘅一部份所以懶得提？」QQ話最初嚟咗我度因為唔使去補習好開心，但結果最後變晒放學睇片自己溫…
V：「唉，如果有得去補習社我都想去呀，我唔介意幫Queenie同埋你交埋學費一齊去上堂添…」
我：「吓？以妳屋企環境竟然無得去補習？我無聽錯呀？定係妳本身叻得滯所以唔使去補習？」