【代糖故系列】《她被寄宿到屋邨男孩的家中》: K340

我：「欸…其實無論邊個輸，對我哋嚟講都唔係好事。」
U：「我唔覺喎！我暴力吖嘛，我蠻不講理吖嘛？我聽日就收你皮，等你影衰晒所有男仔，係咁。」佢講完就出咗課室門口揚長而去，真係夠晒亂嚟。
呢個時候終於全世界擰個頭埋嚟望住我，無論熟定唔熟…嗰幾條band友更帶住複雜嘅暗笑。
我：「欸…騷擾到大家上堂唔好意思，無戲睇喇…女班長佢有啲躁啫，無乜特別。」
「喂，聽日唔好輸得太樣衰喎！」
「有無人想同我對賭？我買暴力女贏！」
「我都買佢贏啦，無得真打，阿爽又唔可以亂掂佢…」
唔止男仔，在場零丁幾個女仔都喺度笑…我繼續整部死人printer，呢個時候阿sir都返到嚟。
「咦，乜jam咗紙咁陰功呀？」
我：「係呀…我唔小心用咗手送紙tray。」




「唔緊要啦…嘩，你做乜扯爛張紙咁暴力呀？」
「係呀阿sir，阿爽佢真係超暴力㗎。」
「佢唔啱啦，佢打女人添㗎。」
「吓？點可以打女人㗎？唔得咁㗎，都唔可以打電子產品…係喇，慢慢抽個toner出嚟，再轉側邊啲轆轆，就可以轉到張紙，但唔好掂個表面，會辣親手㗎。」呢個老古董先生…不過我都喺佢嘅指引下成功整返部機。
「係呢，坐你隔籬位個女同學呢？」
我：「佢有啲唔舒服去咗廁所，抖一陣就會返嚟…」
就係咁，呢場鬧劇暫告一段落，我哋繼續印嘢。
健：「喂，你真係要同暴力女打呀？」
我：「你唔好咁大聲啦，一陣佢返嚟聽到鬧埋你添呀…佢講到咁，我無得唔應戰㗎喎，睇下佢想點啦…」
健：「你會贏定輸呀？我記得你好似幾好打㗎。」




我：「如果死命咁打嗰隻，我有信心會贏，始終女仔啲肉無咁厚同怕痛，但佢要競技就係另一回事，雖然佢學空手道唔係直接呢啲技術，不過如果我唔小心就可能會輸…」
其實…輸贏對我嚟講唔係一回事，反正我本身就乜都輸晒比佢，就算對住YY我都同隻狗無乜分別…講真暴力咪暴力囉，咁執著為乜呢？我周不時俾人話喺出面亂咁溝女，對住女神成隻狗公咪又係咁，理得人哋講乜吖。
過咗陣佢返返嚟，然後就繼續印嘢…
我：「天王星…頭先係我講嘢太過挑釁性，對唔住囉，不如聽日件事算啦…」
U：「聽日放學之前我唔諗住同你講嘢喎。」
妳而家咪同我講緊嘢囉，傻妹妹！我真係好想小學雞咁反擊佢，但我又真係驚俾佢打死，啲女神無個正常嘅…
落咗堂我同健仔就直接返歸，睇嚟佢又約咗靚女打機。