【代糖故系列】《她被寄宿到屋邨男孩的家中》: K341

Q：「喂！你係咪黐線㗎？好地地做乜要辣㷫Uranus？！」過咗陣QQ都返到嚟，然後氣沖沖咁質問我，我唔知係咪天王星直接同佢講，但攪到咁大件事就算唔係讀ICT我諗全級都大部份人知道。
我：「我鬼知咩…叫佢唔好咁暴力對部printer咋嘛。」
Q：「就只係咁？聽返嚟好似唔止咁少喎？」
我：「咁佢咁大反應…都唔明女仔做乜要咁沉迷功夫。」
Q：「頂你，佢喺呢方面好唔輸得㗎，佢覺得自己只要夠努力，就可以乜都贏到男仔…」
我：「有乜好贏喎…不如頭髮鬥短？定係鬥溝得多女？」
Q：「喂，你喺度扎晒馬咁想點，真係要贏佢呀？」
我：「我點知喎…又唔知道佢嘅實力係點，但至少…唔可以俾佢五秒內用背負投一下KO呀，再厚面皮嘅我都要有返少少薄面嘅。」
Q：「你都幾矛盾㗎喎，又厚又薄咁。」
我：「男仔係咁㗎啦，對住妳我都J硬心軟。」




Q：「黐線，勸你唔好睇小佢，同埋我講明先呀，聽日我係絕對唔會幫你㗎，無論你輸贏都懶得理你。」
我：「我先唔使妳理，贏嘅話我就係賤人，輸嘅話就係廢柴，點都唔會好過，妳一齊唾罵我就得，呢個應該就係天王星嘅本意嚟。」
Q：「我唔覺喎，佢應該真係想贏你，你最好唔好太廢柴等佢玩得開心啲。」
按照天王星講嘅規則，呢個遊戲似係柔道或者摔跤多啲…但係喺無明確嘅規則下，就算佢唔係立心打我都可以將空手道嘅技術應用喺呢場較量上面，例如用手刀劈開我隻手，或者用短踢打鬆我隻腳跟…斷估唔會出現spinning hook kick或者掃堂腿呢啲大招掛？我高佢幾cm又重佢幾十磅，除非佢要打傷我，否則啲華麗嘅招式對佢嚟講應該作用不大，反而要提防佢近戰拉郁我嘅重心，胳肋底同後腿呢啲弱點絕對要提防，更加唔可以用死力拉推，如果唔係就會好似肥豬咁俾我扯到一仆一轆，步法一定要隱，採取橫移或者平行斜閃會係比較好嘅策略。
唉…點解我要同個咁麻煩嘅女仔打架，贏咗又唔會有奬品嘅，你話可以制服佢為所欲為就話啫，我一定盡情羞辱佢，等佢平時咁口響響吖嗱！就擳到佢又喊又笑迫佢投降喺我面前表演DIY就差唔多。
唔知QQ係咪有啲嬲我，呢晚佢無乜同我講過嘢…我都唔想同天王星打㗎，一早咪話咗認輸，係佢咁硬頸死都要同我比試。諗返轉頭我好似第一次同習武嘅人打，唔知係咪真係會勁好多呢？定係其實都係花巧招式得個樣？我確實無乜概念，但至少應該識扎馬識閃識擋…
我：『YY妹妹，妳覺得我聽日贏定輸好？』
Y：『咁樂觀？你唔係認為你有得揀呀？』
我：『乜佢真係勁到我無可能贏咩？』