【代糖故系列】《她被寄宿到屋邨男孩的家中》: K344

U：「無問題嘅話，咁我哋而家開始啦。」
我：「開始啦，不過我真係唔識打女人。」
U：「唔好講咁多廢話，希望你唔好讓我。」佢一路望住我隻眼一路行到嚟我面前，正當我諗緊佢會用乜嘢招式嘅時候，佢突然一下跳步彈前扎馬左手穿我左臂，再直接反扣想用右手控我膊頭…我當然知佢跟住就係直接膝壓，呢套係最基本嘅突襲制服術嚟；最恐怖嘅係佢出手之前完全無望過我對眼以外嘅地方，即係話佢對我施襲嘅動作已經早就同programme無乜分別…
而當然呢啲招式就唔係空手道嚟…我諗無理解錯掛？
而我就抽左腳，向左轉，扎返好個馬步，用右臂格返走佢；電光火石之間我都唔知自己撞到佢邊個部位，可能膊頭，亦都可能係心口…雖然目的唔係打傷人，但佢嗰下反扣真係用盡全速同全力，所以唔痛就假，佢都應該係。
U：「你唔好諗住有可能斯斯文文贏到我。」佢講完之後就扎返好個馬擺出空手道起手式，話我知可以隨便攻擊佢…簡單嚟講即係唔好當佢係女仔，本來我係覺得可以全程唔掂佢個身嘅，始終唔想俾人話我抽水。
既然唔可以扯衫，最直接嘅方法就係肢體嘅拉推；我開始嘗試向佢推進意圖捉住佢手臂，咁就可以睇下有無機會使出控制技例如擒拿手…不過唔係普通人嘅佢當然知道我嘅目的，動作可謂見招拆招，結果我哋變咗喺度推手，有高速嘅穿閃，亦都有靜態鬥大力嘅批格；呢條女真係唔止食過夜粥，重食埋日粥添，明明已經差唔多可以捉實佢，一下拉推就俾佢走返甩，而且由於講到明唔可以打人，所以佢唔使擔心我突然對佢暴力施襲例如指貫破喉，拋掌擊面呢啲陰招，就企定定陪我玩一步褪後都唔使…同一時間用隻腳撩我下盤搵空隙戟鬼跌我。
雖然我都唔會咁易失平衡…需知道要制服一件大嚿過自己嘅物體確實殊不容易，我亦識得用返雙方嘅力嚟做重心轉換；點搞好呢？似乎喺手腳上面好難同佢分出高下…
夾硬穿透捉住佢條腰變相撲？索性貼到最埋將佢成個人抱起？點諗都係好鶻突，而且唔見得佢會俾我有機會咁做。
呢個時候我哋嘅眼睛只係得返對方，早就唔記得身邊其實有幾十條友睇緊我哋。




U：「又話男仔一定贏？重企定定喺度做乜？」
我將兩隻手收近心口，平行橫放手指鬆開向佢靠近…即係準備同佢玩埋身技，博一鋪啦…只要我大力過佢，落點喺佢腰頸膊頭嘅話最後應該可以扭得贏佢嘅，我相信…而如果佢唔褪嘅話就要被迫同我纏鬥，只不過最麻煩嘅係佢心口嘅範圍實在係好鬼大。