【代糖故系列】《她被寄宿到屋邨男孩的家中》: K345

喺佢嘅規則底下，基本上互相距離同策略係相似嘅，如果唔係以暴力女嘅火爆性格大概會想一下side kick KO我；正當我伸腳入攝想拉膊勾腳之際，佢做咗一下出人意表嘅舉動，就係用右手鉗實咗我嘅左手，而且係十指緊扣嗰隻，兼且褪後一步，而我都趁亂喺拉扯之間用右手捉返實佢左腕，而佢就順勢同我互扣。
感覺上大家都無咗對手，睇落好公平…
U：「如果喺街，睇怕你已經一頭撼咗落我塊面度，或者凌空膝撞，我講得啱唔啱？」
我：「我咪講咗我係唔會打女人。」
U：「同你講吖，普通人係唔會特登練隻左手㗎。」
無錯，我隻左手唔夠佢隻右手大力…雖然佢係唔會打我，但就已經扭到我左手去咗下手位而且用每隻指骨夾實我，簡單嚟講係佢已經控制咗我左手，而右手大家轉來轉去只可以話係打和。
我迫於無奈將重心轉去左腳以免佢再加大力度變成反鎖，而佢就不停勾腳甚至扭踢我嘅右腳企圖令我失衡，當然呢個係建基於喺佢極其良好嘅平衡力同柔韌性之上，重有我條死人校褲限制咗我嘅移動速度同幅度。
有無方法可以擺脫佢？直接扯佢個身埋嚟撞擊？好似太過暴力…突然踎低拉佢左手打落自己右手？咁同打佢有乜分別…加上以佢體型我極有可能踎低完就再無機會起返身，然而我隻右腳已經俾佢踢到散晒只可以靠不停褪位嚟平衡住個身體，而當然我哋呢啲動作又係靠互相拉扯住對方嚟保持站穩腳步。
理論上我可以將重心突然轉返嚟右手邊扯佢一齊跌，只要扭到佢喺低位，又或者落地嗰下掂唔到膝頭屁股就得，因為佢無話手踭唔可以落地吖嘛，但又好似危險得滯。
又或者博一鋪，喺我褪右腳嘅時候快速反扣返佢嘅重心右腳後背，但當我右腳移位去到中間嘅時候，佢已經識穿咗我嘅動作，隨即擺動重心兼且拉轉我嘅左手，喺無咗右腳嘅平衡之下，我嘅被控手成為中心點而佢就喺外包位挪移我整個身體…結果我諗大家都估到，就係我隻右腳都重未拉到去佢後位我成個人已經俾佢拉反咗，而佢亦都即刻順勢壓落我身度令我成個背脊貼地…




如果我趌高個屁股係咪可以死雞撐飯蓋？算啦…因為喺大部份嘅武術嚟講，背脊落地同頭落地係輸得更慘。
我：「我投降喇…放過我啦。」