【代糖故系列】《她被寄宿到屋邨男孩的家中》: K347

我：「想問下朝早係要幾點開門㗎？」
U：「無明確規定㗎喎，校務處通常七點半就會開門，到咗七點九就會有好多同學上去睇下課室開咗未。」
我擘大口望住佢，到底你哋班撚樣咁早返到去做乜？又唔會有OT錢嘅！咁我咪要每日瞓少成廿五分鐘？！
U：「你唔好咁嘅樣望住我呀，聽聞你好似住附近㗎咋喎，睇你以後重敢唔敢亂講嘢？而家唔得閒應酬你住，我都要換衫放學，星期一再見啦。」
佢講完之後就趕埋我同阿健出課室鎖門，一眾女神陪佢落去更衣室換衫。
健：「你…無嘢吖嘛？」
我：「可以有乜嘢喎，咪又係咁…就當我今世已經負咗太多女仔，而家要還返畀佢囉…」
健：「你會唔會嬲㗎？」
我：「是但啦，唔睇僧面都要睇佛面，唔可以令Queenie難做，況且…大家都知Uranus佢乜事，就當我黑仔。」
健：「話時話，佢係咪真係咁好打？」




我：「係，如果係你嘅話俾佢打死都似。」
健：「啋過你呀！我先唔會惹呢啲發神經嘅女仔。」
乜係呀？小心你又惹著其他唔掂得嘅女仔好過啦。
我：「話時話，可唔可以…間唔中幫我開下課室門。」
健：「點得呀，而家係你俾人罰，我邊敢逆佢意喎。」
哦，好嘢呀下，呢啲就係好兄弟，繼續畀心機啦。
返到屋企，等咗成粒鐘QQ先返嚟，似開完高層會議。
Q：「還好嘛？死仔包。」
我：「如果我喊嘅話妳係咪會呵返我？」
Q：「重識講笑即係無嘢啦，懶得理你。」




我：「咁我係輸得心服口服嘅，天王星佢真材實料。」
Q：「使乜講，雖然我同佢唔同department，都知佢好畀心機，你睇佢成堆陸運會金牌都知乜事啦，我要做功課先，你攰嘅話就抖下啦。」
我：「星期五一放學就趕功課？」
Q：「約咗細龜同Yvonne聽朝返學校錄音呀，我唔似得你咁幸福有人寫晒稿畀你照讀。」
我：「點解妳咁清楚幽蘭佢寫晒稿嘅？」
Q：「以佢性格點會俾你諗喎，佢先唔會浪費呢啲時間…重有呀，我聽日晏晝約咗人食tea，你可以全日唔使理我。」
我：「嗯，又去拍拖拖呀？」
Q：「唔係呀，咪話咗同fans食飯囉，佢約咗我去又一城，好彩都幾近下時間又啱啱駁得到。」
我：「咁…妳慢慢忙啦，辛苦晒。」
我瞓咗個晏覺，起身又同佢一齊做下功課，煮埋嘢食就去返工，一切都無乜特別；到咗第二朝佢十點到就著住校服出咗門口，好似話約咗佢哋一齊食完早餐就返學，我就當然繼續大覺瞓，因為知道遲啲自己將會無覺好瞓。




Q：「嘩！你重喺度瞓緊呀？」時間已經就嚟兩點。
我：「欸…頭先起過身打咗陣機，攰得滯又瞇返埋眼…」
Q：「你話你吖，如果唔係我喺度陪你咪日日都咁頹廢？」可能會有其他女嘅…
我：「嗯，我認同妳呢個推測，實在冰雪聰明呀下。」