【代糖故系列】《她被寄宿到屋邨男孩的家中》: K377

U：「好心你做人阿四就唔好咁多嗲啦，你個心得女神喺度對我嚟講比較安全，成間學校話你左右做兵難又點會得閒講我，如果你對我做過份嘅嘢我隨時可以同Queenie投訴，相反你就算點委屈都唔會敢同佢講，唔係幾好咩？」
我：「我同妳講，同一個自己唔鍾意嘅人練習戀愛，大概只會係浪費時間，因為根本唔係嗰回事。」
U：「咁你又未至於令我覺得討厭嘅，如果…你靚仔啲，再fit少少，讀書叻一截，凡事認真啲，做人積極啲，表現成熟啲，講嘢收斂返啲，我都或者會鍾意你嘅。」
我：「啲啲啲啲啲，啲完咁多樣嘢嗰個已經唔係我嚟啦，妳要求咁高我建議妳留返啲精力發夢嗰陣先去搵白馬王子，唔好要我呢個死細路同妳練習點拖手仔好唔好。」
U：「唔怕同你講…其實我已經有對像。」
我：「乜咁突然呀…應該唔係同班同學？嗯，我會支持妳嘅，妳咁叻女應該好簡單就可以將佢收服。」
U：「唔係同學嚟…佢哋幾個唔知㗎，你唔好同任何人講…唔知Queenie有無同你講過我其實一直有幫手屋企盤生意，小學嗰陣我已經識得做基本會計同開單呢啲，幾年前佢哋知道如果唔轉做網絡銷售嘅話根本無得做落去，呢個年代無人會再想send email同打電話去deal貨再跑去櫃員機入數，佢哋試過搵啲vendor同顧問公司謦解決方案，但所得到嘅答案唔係太貴就係唔適合，因為佢哋做開例如TVmall或者外賣平台呢啲大project，見你想做網頁銷售根本就理都唔想理，屋企人無乜IT知識又無門路，當時可以話係去到邊都撞板收場，同行更加唔會同你分享佢哋點做，嗰陣我都有幫手update公司個靜態網頁嘅，所以就想研究下自己做唔做到，當然，網上面嘅教學係有好多，但我連HTML都只係一知半解就明白單憑一己之力係做唔到啲乜，但我發現咗一個教學blog覺得寫得幾好，於是乎就膽粗粗私自聯絡個blog主討論整呢啲銷售頁面大概要幾錢，謦謦下先知原來佢都係一個喺Kong U讀緊year 3嘅BBA IS學生，結果我就膽粗粗自己約咗佢出嚟…」
我：「小姐妳當年貴庚呀…」
U：「中一咋，佢見到我嗰陣都嚇到呆咗。」
我：「對唔住…我中一嗰陣剩係識非禮一個初見面嘅女仔嘅心口…」你哋唔記得就算啦，我已經唔想再提…




U：「我唔覺得你而家好咗幾多囉，所以我點會鍾意你喎…當時佢聽完我嘅簡介之後，同我講呢啲project好視乎大細同長遠執行嘅可調整性，價錢就兩三萬到十萬不等，我希望佢可以幫我哋整個最簡單嘅解決方案，諗住四位數可以搞掂，但佢話如果整得太粗疏係好唔實際，日後改動會變得好麻煩，而且整呢啲坐底要幾十粒鐘，佢幫人私補一粒都講緊二百幾，無乜可能under一萬，嗰陣我覺得一萬已經係好多嘅錢，所以急到喊咁滯…」