【代糖故系列】《她被寄宿到屋邨男孩的家中》: K387

本來想慫恿佢要求幾張J圖就割禾青走人，但見佢一片痴心咁我都唔好意思再講埋啲咁低俗嘅嘢。
好唔容易捱到放學…我又要等其他人走晒負責鎖門。
V：「交叉仔，我上去Phy Lab等你，唔好走咗去呀！」
如果大家重記得今日係星期三放學要去打橋牌…
U：「嘩，人哋開始叫你花名唔嗌你科長喇喎。」
Y：「無喇無喇，今次睇嚟有人要打爛醋罈喇。」
Q：「望住我做乜，佢哋相處到係好事嚟吖…」
Y：「交叉仔，去打橋牌喇，係得佢可以咁嗌你㗎咋。」
Q：「幽蘭話佢個名好攪笑，所以就想咁嗌佢。」
我：「其實…以前喺街識嘅friend都係咁叫我。」




U：「出嚟撈古惑嘅話呢個朵都有啲霸氣嘅，嚟到呢度好似玩具咁。」
Q：「係咩，妳好似有份玩埋一份㗎喎。」
Y：「咪係，唔知你兩個琴日做咗啲乜呢？」
U：「無做啲乜，佢只係為佢嘅過錯承擔返，補償我嘅精神損失，無其他意思。」
我：「係呀，我唯一要做嘅嘢就係唔好俾佢打中。」
Y：「開心死啦，你個樣咁M底，俾暴力女打係咪好爽，益晒你，肯定係咁喺度諗住打者愛也。」
U：「嗱，再講落去姐妹都無情講，係咪迫我收拾妳？」
Y：「交叉仔救命呀，係你攪出嚟㗎，要保護返我。」
U：「妳哋唔好亂講，我只係要佢幫助我習武…練功。」
Y：「即係…楊過同小龍女…係個古墓入面練嗰啲？」




Q：「玉女心經？好似要除衫㗎喎…」
U：「妳兩個女人…我唔得閒同妳哋癲呀，咪污染咗我哋清純嘅Zilvia，我同佢要落去訓導組開例會喇。」
Z：「Uranus…妳要變大個女唔陪我嗱…」
U：「做乜呀？連妳都玩埋我一份呀？我先唔會要呢隻高大衰呀，佢只係配俾我糟騭…」
Y：「咁講都有嘅？妳明搶人哋隻兵到年底㗎喎。」
U：「我要佢幫我開門鎖門咋嘛，呢個係佢應得報應。」
Y：「咁妳星期二唔好要佢陪妳練空手道囉，或者可以外判佢畀Zilvia玩下，等佢感受操兵嘅樂趣。」
Z：「如果幫我帶彼拉多，咁都可以嘅。」
U：「夠喇，唔好聽呢兩個女人講，交叉仔係極度危險嘅生物嚟，而妳無保護自己嘅能力，我哋落去先。」
的確成班都係八婆嚟，坐喺中間就好似入咗佢哋嘅法陣咁郁不得其正；識相嘅阿健見到我俾女圍住就孭起書包走咗，唔方唔係要線上陪佳人讀書咩。




Y：「得返我哋可以講正經嘢喇，你朋友佢到底攪乜？」
妳都知妳哋頭先幾唔正經，放咗學成班女神喺度調戲一個手無寸鐵嘅男仔，咁樣實在係成何體統？
我：「妳話我朋友？佢有乜特別？」我指住QQ。
Y：「你唔好扮嘢，我係話阿健，上上下堂無端端望住本書嘰嘰笑，成個精神病人咁。」