【代糖故系列】《她被寄宿到屋邨男孩的家中》: K388

我：「呀大美女，妳唔係諗住佢係因為妳而嘰嘰笑呀？」
Y：「千祈唔好，我只係覺得佢好恐怖。」
我：「男仔嘅嘢，有女咪嘰嘰笑囉，邊似得我呢啲俾人罰鎖門，一片愁雲慘霧咁。」咁樣對住佢兩個，我哋三個人都要做戲，呢場遊戲都唔知需要維持幾耐…
Y：「佢有女朋友？係呢間學校嘅？」
我：「我唔識形容係咪女朋友，唔係呢間學校嘅。」
Q：「唔怪之得無見過佢喺學校溝女，邊度識返嚟㗎？」
我：「打機識掛，其實我唔係太清楚佢啲嘢。」
Y：「你最好勸佢一下唔好太過黐線，佢呢個樣實樂極生悲。」
我：「做乜無端端咁關心隔籬位？想教佢溝女呀？」
Y：「先唔係關心佢，我驚佢好快就會由笑變喊，我唔想有個黐線佬喺我隔籬影響我嘅上堂質素。」




我：「唉，妳理得佢咪得…人哋愛戀沒經驗係咁嘅款㗎啦，我都唔想知佢啲嘢，不過妳小心雙鬼拍門，連右手邊嘅細龜都神神化化，所以唔好刺激佢哋喇。」
Y：「佢又攪邊科？本身佢就已經奇形怪狀…」
我：「懷疑俾…女KOL行騙啫，妳都知佢呢啲宅男…」
Y：「得，如果佢哋出事嘅話，我第一個同你調位坐，留返你朋友啲蘇州屎等你處理，咁問題就解決晒。」
我：「唔好標籤佢哋做我嘅朋友啦，就算係都唔關我事嘅…我好珍惜而家呢個位㗎，呢兩個先係我朋友。」
Y：「妳隻兵好串嘴喎，點管教佢㗎。」
Q：「都話唔關我事咯，我又阻唔到佢視我為朋友嘅，如果佢識時務嘅話就唔會攪到Uranus要整治佢。」
Y：「咁而家都好，有人治下佢等佢無咁囂張。」
都唔知做乜，自問識妳哋以嚟一直以禮相待，只有好好服侍妳哋，何解會變到好似妳哋個犯咁。等到佢哋走埋我終於可以鎖門還匙，然後又要上返去搵幽蘭打牌，今日嘅佢喺度教緊圍低form打，自從佢嚟咗之後橋牌學會終於由一個hea到核爆嘅學會變返做有少少作為，基本上每次都有十個八個人喺度，當然好大程度上啲人係為咗去見下幽蘭而出席啦，就算只可遠觀都夠怡情養性。
V：「好，今日就到此為止啦。」




我：「噢，大小姐今日終於有嘢要忙嗱？」其實我相信佢經常性都好忙，只不過星期三忙我就可以早啲返歸。
V：「無錯呀，一陣約咗你個普通朋友去玩。」
我：「原來係咁，妳哋嘅生活真係夠晒充實…」對我嚟講，早啲返屋企嘅唯一意義就係對住QQ一齊做功課，如果佢要出去玩呢個自然需求就會消失，只不過而家幽蘭約咗佢我都無得再對住呢個仙女…
明明我就係一個周圍躝街嘅浪子，做乜而家攪到好似身邊一無女就會死咁，不過我絕對唔會犯賤到走去睇下天王星會唔會啱啱開完會嘅。