【代糖故系列】《她被寄宿到屋邨男孩的家中》: K389

V：「你都要跟埋嚟呀，所以一樣咁充實。」
我：「吓？我都要跟埋嚟？為咗乜呀？唔通妳哋要去shopping我負責幫手搬嘢？」唔通係QQ嘅主意？
V：「一陣你咪知囉，而家返屋企接你女神落嚟先，我哋喺你樓下對開嘅車位等。」
我：「不如講咗要去邊先，有無嘢要準備㗎？」
V：「返到去你咪知，快啲啦，唔好嘥時間。」我哋啱啱行到去後樓梯，佢見無人又哄埋嚟嘴咗我一啖。
我：「做乜…無端端又惜我…」我都唔知問嚟做乜…
V：「咁一陣Queenie喺度我邊會有機會惜你喎。」
我：「妳咁樣對我，萬一我鍾意咗妳點算？」其實呢句廢話嚟，正常嚟講無一個男仔會唔鍾意幽蘭。
V：「呵呵，咁就死咯，我實告狀畀你女神聽。」
我：「妳哋…簡直係喺度州官放火。」




V：「哈哈，我惜完你你又唔敢惜返我，好得意…快啲行啦！」佢到底係乜嘢心態？先排除佢係真心鍾意我，因為我唔相信有呢個可能性…唔通係因為覺得我全心全意對QQ，所以想測試下我有幾堅貞？定係佢係純粹為咗玩？基本上我同意惜惜呢件事係好開心嘅，只要對方睇落都OK嘅話，正如我同貞姐惜嗰啖我都覺得好爽㗎，就算我唔太識佢亦無可能鍾意佢，如果Angel突然彈出嚟索取我就更加…或者細蚊無咁迷我嘅話都可以玩多啲…
但佢有無咁男仔性格呀？乜女仔係咁㗎咩？唔係應該好似天王星咁掂下個嘴仔就發晒癲㗎喇咩？
Q：「我著呢件衫會唔會暴露得滯？」我一入門口就見到佢著住件奶紫色嘅幼帶sport top，後面係叉叉繩露背嘅，而下面就剩係得我買畀佢嗰條翠竹色底底。
我：「妳呢身裝扮，除咗去跳鋼管舞重有乜嘢可以做？」重有我唔敢講嘅脫衣舞，夜總會陪坐，黃播KOL等等…
Q：「我淨係講上面呀，呢件top靚吖嘛！」靚係因為妳有對大波波，肌膚滑嫩亮麗，兼周圍無贅肉唧出嚟…
我：「靚喇靚喇，但係一陣要去邊呀？」
Q：「我都唔知喎，幽蘭叫我換運動衫又唔講去邊，我問佢係咪去溜冰佢又話唔係…總之出咗去先。」
我：「咁…即係我都一樣啦。」
Q：「算啦，唔知去邊都係唔好咁爆，著返件鬆身T遮一遮先。」明嘅，女仔嘅concept就係著咗好多布都同無乜著一樣，肚仔繼續賣大包，烏低少少又係倒奶咁…
而我，保守起見都係著返收拾天王星嗰套衫…嗱，我有洗過㗎，因為啱啱晾乾收嚟直接著慳返啲工序。