【代糖故系列】《她被寄宿到屋邨男孩的家中》: K393

Q：「我去一去廁所先。」剩返我同幽蘭喺度。
V：「我都差唔多夠鐘要走先。」
我：「係嘅，你屋企看到妳咁實，咦…妳管家呢？」
V：「佢啱啱沖完涼出嚟你睇唔到咩，出咗去攞車喇。」
我：「無留意到…咁妳唔使沖涼咩？」
V：「佢驚喺架車度臭親我同埋要換衫先沖涼啫，我呢啲就梗係返屋企先沖啦。」
我：「咁又係，妳哋女仔出完汗都係香噴噴嘅。」
V：「香你個頭呀，咪成日諗鹹濕嘢啦，唔阻你同Queenie拍拖喇，玩得開心啲。」佢望一望周圍然後又嘴咗我一啖，攪到我好似俾人非禮咁。
呢個時候QQ出返嚟，幽蘭就同我哋講bye bye落去上車。
Q：「開心死你啦，有我哋兩個陪你做gym。」




我：「其實日日對住妳已經夠晒開心，呀，唔係，係有得嚟健身室玩好開心，我好鍾意呢度。」人係腐敗嘅生物，有得歎住冷氣望住其他靚女操機梗好過喺街邊㞗跑。
Q：「你鍾意可以日日嚟㗎，剩係計沖涼啲熱水同沐浴露成本可能要倒蝕畀你。」
我：「未至於咁狼死嘅，日日嚟玩會郁唔到㗎，如果特登嚟沖涼唔太化算，行過嚟都要十五分鐘，來回半粒…」
Q：「返去嗰程搭巴士囉…係嘞，會費你真係畀到？」
我：「畀到嘅…由妳嚟嗰陣已經知我有幾多錢㗎啦，到而家啲錢其實無少到重多咗啲啲，我聽日畀住一半先囉，同買部遊戲機嚟玩差唔多啫。」
Q：「咁我寧願你嚟做gym好過，身體健康啲又可以靚仔啲。」
我：「乜妳會關心我靚唔靚仔㗎咩？」
Q：「至少我唔會想喺屋企日日對住個又頹又懶剩係識對住部電腦打機嘅肥仔囉。」
我：「放心，呢樣嘢唔會發生，以前都唔會。」
Q：「係，你重識得對住部電腦打飛機吖嘛。」




我：「都算係運動嘅…咁有得嚟玩妳係咪好開心？」
Q：「嗯，而家啲健身室重要開七廿四，實在好方便。」
我：「就算妳以前嘅會所係咪都做唔到？」
Q：「會所係開廿四嘅，但健身室嘅main area十一點就會閂，剩返出面有幾部舊款同唔使插電嘅單車機，踏步機，呢啲比較安全同唔驚俾人破壞，都叫有得玩嘅，我好鍾意食完飯落去玩住嚟睇書或者睇片，到十二點先返上去。」
我：「所以幽蘭先咁羨慕妳，就算屋企咁富貴都可以由得你咁樣。」
Q：「可能我落咗去佢哋都未必知啫，平時食完飯就返房，爹地會喺電腦前面望住個市，媽咪又唔多理佢…」
我：「欸…唔好講喇，總之以後妳隨時都可以過嚟玩。」