【代糖故系列】《她被寄宿到屋邨男孩的家中》: K399

到咗第二朝，又係悲哀嘅我返去開門…
我：「大小姐，畀住一半妳先，呢度二千蚊。」
V：「嘩，有錢收好開心呀！」呢啲本身咪妳嘅錢嚟…
我：「有乜咁開心…散銀嚟啫。」
V：「唔係呀，收你錢係特別開心。」
我：「點解呀？因為係現金嚟？」莫名其妙…
V：「因為…個感覺好似我係惡德商人喺度壓搾平民咁，哈哈哈…」佢到底有幾惡趣味？重要用日本字彙…
我：「只此一次㗎咋，妳唔好得閒就捉我哋去廸士尼，去豪飲豪食，小弟實在係無能為力。」
V：「本身就話一早幫你哋畀埋㗎啦，係你死要面。」
我：「唔關事，妳包起佢就好，我想做返平民…」




好死唔死，我哋嘅金錢交易俾啲唔應該嘅人睇到。
U：「啊，幽蘭妳做乜收佢錢嘅？」
我：「唔係收，係我還返啲錢畀佢啫，妳咪諗錯隔籬。」
V：「嗯…佢還返啲特別服務費畀我啫。」
U：「吓？！乜特別服務？妳點可以咁唔珍惜自己！」
我：「邊有乜嘢服務？呢啲！我只係還返…」幽蘭做乜要講到好似有嘢咁？但我發覺根本就解釋唔到，因為我要保護QQ嘅秘密，講多就只會錯多…
V：「咪就係我嘅特別借貸服務，多謝惠顧。」
U：「妳咪借錢畀佢呀，條友仙都唔仙下，妳借錢畀佢轉個頭買禮物送晒畀Queenie，妳唔使指擬收得返。」
V：「原來係咁…咁似啲天仙局，如果我同Queenie夾手整佢嘅話，佢好快就會無限負債㗎喇喎。」
我：「咪亂講呀！我好歹都有返兼職㗎，點會無端端要借錢，同埋呢個只係我朋友嚟，先唔會送啲乜禮物畀佢。」




V：「哦，咁唔借錢囉，多謝晒你嘅保護費。」
我：「吓…妳可以保護我啲乜？」
V：「你收買咗我，我就唔將你啲衰嘢講畀女神知。」
U：「喂！你個死仔包又對人哋做咗乜？手刃你㗎！」
我：「無呀，我乜都無做過，唔好夾埋砌我生豬肉喎…」
V：「我已經收咗佢錢，所以而家乜都唔可以講。」
U：「咁啱喇，你都好應該俾我保護，交多份畀我喇。」
我：「我點解要俾妳保護…」
V：「咁你打輸咗比佢，所以由佢保護返你好合理吖。」
我：「妳哋都黐線嘅，人多蝦人少先唔得閒同妳哋癲，我同隔籬位只不過係同學關係，妳哋想點就點啦…」




U：「發窮惡呀，就叉禍你嘅好事。」
我：「邊有乜嘢好事，佢先唔會學似妳哋喺度無風起浪…」越嚟越明白QQ所講啲八婆到底有幾煩。