【代糖故系列】《她被寄宿到屋邨男孩的家中》: K401

健：「唔好啦，我完全唔知應該點做好，你救下我啦。」
我：「我唔知你乜事，又唔識你條女…點救喎…」
健：「今日放假無嘢做，你就出嚟陪下我啦。」
我真係有啲想爆粗，你就話放足兩日假啫，我琴晚同嚟緊今晚都要返工㗎！你自暴自棄嗰陣就叫我日日陪你做運動，到有女嗰陣有理過我咩？憑乜…
健：「上次我夜一夜都幫你去長洲啦…你就做下好心…」
屌你個契弟，為咗報答你我一早花盡學富五車之力嚟令你有得同社長玩下，QQ又亂打亂撞令你失埋身添，早就乜都還晒啦，而家走嚟情緒勒索我…
但養兵千日，用在一時呢個道理我唔係唔明嘅…
我：「我面都未洗，不如你上嚟算啦…唔係喎，QQ喺度好似唔係幾好…欸，真係麻煩…」
Q：「你喺度咿咿哦哦咁做乜呀，係咪講我壞話？！」
我：「哎吔，你個下屬被情所困呀，不如妳嚟安撫下佢啦，我唔識點幫佢。」點知佢真係行埋嚟攞起電話。




Q：「乜呀，乜唔敢講呀，你走嚟煩住佢我重有可能唔知咩，剩係睇你上堂個樣都知乜事啦。」
佢呢啲出色嘅女仔真係好恐怖，平時對住男朋友就扮可愛清純，我想象唔到如果同佢一齊會承受幾大壓力。
Q：「激嬲人？好正常啫，有邊個男仔拍拖未試過激嬲女朋友，如果你做到就唔會到而家都唔識溝女啦。」
唔識溝女原來係錯嚟㗎，佢真係好mean…
Q：「唔知你呀，而家我哋都俾你嘈醒晒喇，你鍾意就上嚟啦，呀，唔得，你阻住本小姐瞓覺，買埋早餐上嚟請我哋食就應酬你啦。」
講打劫男仔嘅手法，佢同一個專業騙徒無分別。
Q：「諗到咁複雜做乜？樓下茶餐廳咪得囉，我要羅宋湯通粉，炒蛋熱檸蜜，其他是但啦，都係喂個飯桶…」
我：「咪住！我有外送動物卷！交畀我嗌就得，我知佢食乜㗎喇，叫佢企喺門口等攞啦，返嚟畀返錢就得！」
Q：「哦，你鍾意啦…佢話要熱齋啡喎…」
吓，男仔食茶記飲熱嘅？睇嚟佢堅係失戀喎…




難得有三份早餐兼且外賣，正好可以用咗張百二減廿四卷，又唔使真係我畀錢，但又可以收返個傻仔錢，絕對係一舉兩得，無本生利，當幫補下我去做gym…
落完單send幅圖畀佢，我又撻返落床等早餐食。
個陰功豬隔咗足足廿五分鐘先上到嚟，辛苦晒佢。
我：「啊嗯…入嚟啦，麻煩友…」我攞咗兩大袋嘢上枱。
呢個時候QQ喺廁所行出嚟，洗好面，刷好牙，梳好頭，戴返好埋個Bra，但就仍然係條短到露埋個死人pat嘅褲…
我：「呢條友而家乜都睇過晒，唔得閒望妳㗎喇。」
健：「認真呀！我淨係想知我而家應該點樣算…」