【代糖故系列】《她被寄宿到屋邨男孩的家中》: K406

我：「其實妳咁熟呢啲，有無考慮過建立返一個專業嘅邪惡犯罪集團，統領千千萬萬嘅小混混？」
Q：「無喎，使乜咁麻煩，呃男人錢就已經係最方便。」
我：「呃，好彩我一窮二白無得俾妳呃。」
Q：「係咩，可能你睇唔到自己一頸血啫，我要去裝下身先，你留喺度好好陪下你朋友啦。」
過咗陣QQ就出門口，睇到佢著得咁密實裇衫扣到上頸重配埋條長褲就知佢係去啲正經地方；諗落QQ生完日之後就已經十五歲，唔再係童工可以返工，以佢咁努力嘅性格又點會放過任何改善自己生活質素嘅機會，雖然背後重有枝大水喉射住佢…
個傻仔碗麪一早俾我清晒，剩返個軀殼喺度飲緊一杯唔再熱嘅齋啡，望住佢就好似見到一個死人咁。
上年唔見咗細蚊，其實我都唔係話有幾掛住佢，而係覺得佢衰，心入面好嬲佢咁對我，同擔心以後無女人俾我用…
我：「愛上咗一個唔鍾意得嘅女人，唔係一件好事嚟…」
健：「你夠係…沉迷女神…」
我：「算，唔好再講女人，不如打下機忘記晒啲煩惱。」




見到佢咁嘅死款當然唔可以玩啲太燒腦嘅遊戲，又要陪佢一齊玩，又唔可以開隻格鬥game出嚟打贏佢，幾經思量之後我打開模擬器同佢玩下懷舊game，返去1945年一齊蕉蕉蕉打飛機，我重專登較到easy難度等佢唔會係咁死，爆完第一集就玩第二集，讓埋架最好用嘅pancake畀佢。
健：「其實…你重鍾唔鍾意…大卡車？」
我：「吓…做乜隔咗咁耐先無端端問我呢樣嘢？」
健：「無…純粹八掛下。」
我：「嗯…我鍾意佢性格㗎，亦都鍾意佢個身體，佢對我好好，去到最後都無將我中出即飛…不過…而家諗返就知唔係嗰回事，我都係想同佢玩啫，所以唔會再有可能。」
健：「你最鍾意就係同女仔玩。」
我：「或者啦，所以我都好佩服自己可以同個女仔一齊住到咁耐都無乜事發生…你都可以當自己只係玩完一場遊戲，而且客觀嚟講你已經爆晒game添，你應該有能力可以換第二隻game識下其他女仔。」
健：「我覺得…啱啱打完tutor mode連個save都未開。」
我：「輕輕鬆鬆咪幾好，無必要set到咁難吖。」
健：「一隻game有難度俾你較，一定有佢嘅意義喺度…而且，我諗我鍾意唔返其他低低BB嘅女仔。」




我：「重好意思話人，你自己都係低B仔一個嚟咋。」
健：「我知呀…我認我犯賤嘅…」
我：「細個又唔一定低B嘅，就算同我哋差唔多大，都有一啲比較成熟嘅女仔嘅。」
健：「我知道，但好似Queenie呢啲我邊有資格識。」