【代糖故系列】《她被寄宿到屋邨男孩的家中》: K417

我：「哈哈，你唔好咁好想象力啦，實唔會等到嘅，你俾大姐姐呃咗喇，豆釘。」
東：「可惡，妳哋都好可惡，而且妳細過佢又高過佢…」
我：「係囉，個天真係唔公平呀可，希望你大個仔之後會高過我啦，聽聞勤力啲讀書係會快高長大㗎！」
※※※※※
我：「妳下下都咁落力唔攰嘅咩？」呢個女人又係打到唔願走，見我喺度就瘋狂咁練習各種拳腳招式，由於打到越嚟越順佢基本上已經無晒form，自由搏擊咁；唔好話攰，有時我擋乜咗會有骨撞骨嘅情況出現，照道理佢無理由唔痛，不過劇烈運動其實都係止痛劑嘅一種。
U：「如果做人咁易認輸，又點會成功呢？」
我：「嗱，唔理妳輸定贏，呢世我都唔會再同妳對打。」
U：「知喇，煩，我唔係話你，只係想自己有能力可以保護到其他人同自己，有辦法面對到各種危險處境。」
爹地講過，喺啲貧窮國家九反之地，要確保安全最好嘅方法就係唔好離開安全嘅環境，唔好貪得意，唔好強出頭，要保持低調同身處嘅地方融為一體等人察覺唔到你。
武力係最後嘅手段，而且一出手就要確保用最短時間取勝，否則…你寧願俾人綁起等死都可能安全過同人打，唔知管家先生佢係咪咁諗呢？不過佢第一要務係保護主人…




我：「其實妳有無諗過呢啲諗法會令妳更加危險。」
U：「唔通你認為逃避就解決到問題？咁不如台灣投降先？」呢啲就等開戰先算啦…
我：「留得青山在，那怕無柴燒呢…人哋既然諗住用武力解決問題，會唔會一開始就打算同妳赤手空拳打？呢個世界有武器㗎，對面揸住槍或者刀妳又衝過去？」就好似細蚊EX條仆街仔，但嗰刻唔打扁佢實在難洩心頭之憤。
U：「香港無咁易有槍嘅，如果係刀嘅話應該有方法應對。」相信又係嗰啲害人不淺嘅刀術訓練。
我：「乜妳真係咁諗？」
U：「按道理我一腳踢中你手腕無可能再揸得實把刀。」
先唔講我把刀到底有幾長，妳接唔接近到我，要知道日本武士刀係一種好恐怖嘅武器，喺槍出現之前…
我：「按道理我會唔會企定定俾妳踢中我手腕？同埋唔好唔記得妳而家係赤腳，著返對軍靴先或者可以考慮下嘅。」打得機多，你係會真心相信嗰啲防刺背心，戰術手套，手腳護板係會加大量def值嘅。
U：「可惜吖，我哋永遠唔可以攞把真刀嚟試。」
我：「或者我可以同妳玩一個遊戲嘅。」




U：「係乜呀，用手刀代刀呀？」