【代糖故系列】《她被寄宿到屋邨男孩的家中》: K418

我：「唔係，我去攞枝marker，妳當佢係一把刀，試下打走佢或者制服我，睇下有無機會唔俾我劃花？但…妳件袍係白色我唔知道花咗之後洗唔洗得甩。」
U：「我又唔止一套，同埋，就應該唔會劃花到嘅。」
我：「如果妳咁肯定就可以開始，我會飾演返一個唔識打架嘅持刀匪徒，所以妳唔使擔心我會起腳。」
雖然呢度唔係課室，但都有塊白板同marker，我隨手就配置好武器慢慢行去殺氣騰騰嘅天王星身邊。呢個女人好冷靜，雙眼狠狠咁望過嚟但我知佢嘅集中力其實係喺我隻右手上面，估計佢會打算一下turning kick掃落我隻手度，要知道佢係暴力女，一下中到應晒我都會凶多吉少…始終我手上面揸住嘅又唔係真刀，得零攻擊力咁大把。
當我行到佢起腳範圍嘅時候，如我所料就係一下轉踢，以佢技術水平係中硬嘅，所以我即刻抽手…避係避到嘅，但刮到少少手背都咪話唔痛；接落嚟佢就衝前用近身技打算劈我前臂同扣手踭…跟住無謂提…
我：「女俠…饒命！投降喇！」我而家嘅動作樣衰到爆，左半邊身貼住地，右手俾佢扯起扭住，條腰就俾佢隻臭腳踩到實一實，一般人喺呢啲情況係無可能再還擊，而我手上面嗰枝筆當然一早跌咗落地。
U：「垃圾，睇嚟你讓我讓到連掂到我都唔想咁喎。」
我：「不如，妳睇下件衫有無花先？」我坐返喺地下度望住佢，佢檢查完一輪之後就心知不妙。
手臂位有一劃，條腰上面有一劃，另外第一下碰撞嘅時候佢腳踝都花咗，雖然佢制服我只係用咗幾秒，但混亂之中已經俾我得手。
我：「唔好同人打架啦，而家要洗衫嘞，係咪衰呢。」




U：「睇嚟係我太睇小你。」佢坐埋喺我前面。
我：「唔係睇小我，係睇小一把刀，要知道呢樣嘢掂到就會受傷，而且刀鋒唔止係一個筆尖，點線面嘅嘢妳重清楚過我啦，諗下中咗幾下之後重有無咁大力制服我啦。」
U：「睇嚟你啱，唔應該同一個揸住刀嘅人打架。」
我：「本身就唔應該打架…如果迫於無奈要打，你可以嘗試下降低對方攻擊性再突襲，要知道妳係同緊人搏命，而唔係用武術嚟取勝，無得唔傷害對方㗎喇，妳諗下，如果妳一開始就打算用一下side kick KO我，一般人顧住攻擊係有機會中到應，咁佢可能拖到妳一刀，但中正一下side kick嘅即時打擊力係可以嚴重過插一刀，咁妳就可以即時解決對方，再唔係咪一拳打頭，踢朘朘，總之用最快最狠嘅手段令對方失去攻擊力，或者攞武器，一張凳，一枝地拖，甚至乎一條皮帶，都絕對好過赤手空拳對住一把刀。」