【代糖故系列】《她被寄宿到屋邨男孩的家中》: K478

我：「無可能啦，因為每隻牌都有機會乜咗少少，當個系統越嚟越大，啲error就會累積，去到某一個臨界點佢就會崩潰，妳見到呢度出咗少少上面已經無咁平。」我嘗試用我僅餘嘅學術知識嚟答佢，因為我知佢好認真。
V：「咁如果可以好小心，每一個環節都做到完美呢？」
我：「咁…或者真係可以無限，有方法去到n層，就有方法去到n+1層，我細個都搭唔晒一副牌。」
V：「n+1，睇嚟你覺得係MI原理咁喎？」
我：「大小姐，我讀嘅係M1，唔包MI㗎…」
V：「你諗下喎，當你每多一層，其實最底只係多咗兩隻牌，而上面個重量係多咗斜邊咁長乘三咁多隻牌，啲卡嘅韌度其實係有限嘅，當呢個比例越嚟越高…嗯其實可以算係二次方比，你覺得重可唔可以無限落去？」
我：「唔得掛，至少牛頓力學去到無限就會用唔到…」
V：「畀你睇下吖，呢個係健力士世界紀錄搭啤牌最高嘅紀錄保持者，佢叫Brian Berg，可以起個city出嚟㗎！」佢開咗段短片畀我睇，主角係個外星人嚟。
我：「我知錯喇，我唔再玩啤牌，會好好地返去讀書。」
V：「人哋重係哈佛大學畢業㗎。」




我：「…」好叻咩？如果我雙學位，哈爾濱大學加佛山大學畢業唔知有無得諗呢？
然之後幽蘭又進行佢最開心嘅活動，就係抽走底啲牌等個塔冧，通常第一張未必冧，第二張就冧硬。
今日幽蘭要早啲落去謦個社就職典禮嘅嘢，玩咗兩鋪就走咗，佢哋真係好嚮往呢種充實嘅生活。
席：「你個死仔包！點解你可以同咁多女神friend？」
興：「係囉，過幾招嚟聽吖，學唔到都得個知字吖。」
我：「首先你要有第一個女神friend，然後就會蔓延…」
呢樣嘢好多人都講過，當你有過第一個女朋友，再搵就唔會話難得去邊…但你開唔到個頭咯，咁就…
席：「咁點樣先可以有第一個？」
我：「最容易嘅方法就係佢坐咗喺你隔籬位。」
興：「呢樣嘢點控制，點解你可以成日同佢哋坐嘅？」




我：「最簡單嘅方法，似乎就係得罪咗你嘅班主任。」
入得橋牌學會當然係hea底之人，想溝女想型就梗係入SU，社，校隊呢啲，至少都搲返個圖書館隊長嚟做點會留喺呢啲腐爛嘅地方；所以我知佢哋對幽蘭唔會有任何嘅奢想，只係想八掛下，咁樣都幾好吖，唔似得某隻健仔喺度咁struggle。
幽蘭走咗之後大家好快就散場，四點半左右就唔見咗大部份人，所以我都不宜久留，點知一攞起部電話…