【代糖故系列】《她被寄宿到屋邨男孩的家中》: K497

QQ當然同佢約定咗唔會出聲，所以就摸一摸佢個頭；感覺上佢哋返咗去石器時代嘅夜晚約會，無乜嘢講又乜都睇唔到，而細龜買嘅眼罩上面係印咗對卡通眼喺度，我就不便評論咁樣係自然啲定奇怪啲，各位可以自行想象下…
然而原來呢一刻，有另一個我識嘅傻仔都戴住眼罩。
龜：「妳唔使驚，我係絕對唔會偷睇妳個樣嘅，但我相信一定係好靚…」QQ畀唔到啲乜反應佢就唯有捉住佢手。
成世人第一隻掂到嘅女仔手就係QQ，都算你幾好彩。
龜：「女王，妳真係好好人，好溫柔，隻手重好滑，滑到布甸咁…不如…妳就喂我食先。」我唔評論佢喺度摸QQ隻手算唔算曳，但好歹都叫約會…正常嘅。
而呢度係QQ屋企嚟，所以佢好純熟就攞咗杯布甸同埋鐵羹，但為咗扮到真實啲就專登摷多幾下同轉兩個圈，然後出返嚟就打開杯布甸用隻羹潷嚟喂畀佢食。
其實我知道QQ心底一定覺得勁無聊，對住佢可能當湊小弟弟咁，因為女神平時對住我呢個魔頭都可以無乜感覺。
我有啲羨慕細龜，因為我感受到佢發自內心嘅興奮，兩隻手好唔自然咁摙住自己大髀，重要坐到個人勁直。
龜：「女王，不如妳都食啲吖。」
QQ好大方無介意細龜啲口水尾，用返同一隻鐵羹潷咗兩啖布甸落口…係嘅…細龜係處男，重係一個相對上企理嘅宅男，唔使太擔心佢嘅衛生，但我都係無眼睇…




基本上我剩係見過佢著校服個look，而今日嘅佢係著咗一件灰白色格仔休閒裇，扯布深灰色長褲，應該係準備咗好耐，我懷疑佢今日成個朝早都喺度不停沖涼洗面刷牙…
一杯大滿足布甸又可以玩得幾耐吖，五分鐘到就食晒，QQ彈一彈個空膠杯嚟話佢知，明顯係高音啲嘅。
龜：「呀，無晒嗱…真係快，不過真係好好味，實在係甜到入心，妳食唔食得出呀？」我唔肯定咁樣喺外人面前同女仔約會係咪好黐線，話就話我理應睇唔到啫，但就算剩係聽到聲都已經夠我打晒冷震。
細龜比我想象之中多嘢講，睇嚟黑桃女王喺佢心中真係一個好有意思嘅人，我唔敢講佢呢啲對白係咪真係有女仔受落，但都至少比以前嘅傻仔健自然同勇敢。
活喺呢個世界最緊要面皮夠厚，人無恥便無敵，只要你唔尷尬，尷尬嘅就係人哋，如果兩個都可以鬥唔尷尬，咁就已經隨時上埋床都無問題；等我遲啲都要挑戰下，同個唔係太熟嘅女仔講，我粒睪丸中咗毒必須盡快將毒液排出體外，可唔可以幫幫手揭開條裙畀我望兩下，最好就可以扯開埋條底底同拉開塊皮…
我由衷地佩服QQ可以從容咁同我呢條仆街一齊住…
QQ捉住佢隻手劃咗兩下，我諗係叫做答咗佢條問題。