【代糖故系列】《她被寄宿到屋邨男孩的家中》: K496

我：「嘩！你攪乜鬼呀？！」我點都要扮驚奇嘅…
龜：「哎吔，你…唔好望住我啦，你拍過咁多次拖呢啲嘢對你嚟講實係小兒科。」然後佢跑去雪櫃放布甸入冰箱。
大佬，我都唔係拍過好多次拖啫，我覺得以你呢堆嘢嘅奇怪程度係超越咗我玩晒大卡車上身下身所有窿窿。
然後佢就喺度keep住send message，我當然懶得理佢。
龜：「想問下你有無鎖門㗎？」
我：「無呀，一陣佢入嚟嘛，你頭先聽唔到嘅咩？」
跟住佢試下我道閘推唔推得開，又望住我門牌號碼。
我諗QQ見到佢咁嘅樣實想笑死都似。
龜：「唔好顧住打機啦，你一陣都無得玩㗎喇。」
我：「哦，得啦，佢係咪就到喇？」




龜：「重有一個站，係呢，可唔可以熄埋部電腦佢？」
奇奇怪怪，都唔係好光啫，跟住我就熄咗個mon。
龜：「唔係呀，我意思係成部電腦熄咗佢。」
我：「吓…有乜分別喎，一陣都唔會有人用部電腦。」
龜：「個風扇嘈吖嘛，熄咗佢好似好啲。」
我心裡面屌咗一聲出嚟，電腦嗰幾把風扇可以有幾嘈呀，你唔好話個硬碟嘈同埋啲磁場影響到你？！咁大部冷氣嘈n倍你又唔叫我熄？睇嚟你都重有少少常識知道招呼女仔係要開冷氣。其實我知道佢無惡意，但實在係幾難頂。
龜：「佢差唔多到喇，你戴眼罩先啦。」
我：「咁你唔一齊戴？」我有啲不明所以。
龜：「我要監察住你守規矩嘛，點知你會唔會奸茅偷睇女神，一陣激嬲咗佢咁我點算？」…，你好好努力。
我坐喺床而佢就坐喺梳化，我知道佢一定會喺戴罩前留意我有無犯規嘅舉動，而為咗令佢安心我決定守株待兔。




過咗陣我聽到佢行去熄燈，然後又返埋梳化度；呢度好歹係我住咗十五年嘅屋企嚟，就算睇唔到嘢都可以清楚周圍嘅一舉一動，過咗陣我聽到拉鐵閘嘅聲音，於是乎我就拉低咗個眼罩，一嚟我知道QQ會確認佢戴好先入嚟，二嚟我亦可以第一時間留意佢有無古怪。
QQ望一望我，我就一轆木咁坐喺度，為咗唔影響佢嘛，然後佢就行咗去細龜嘅前面。玩埋呢啲嘢真係好危險，如果入嚟嗰個係賊一刀就可以解決你，但如果細心一諗其實搭車瞓覺都好危險，隔籬位三唔識七short咗嘅話一樣可以了結你，要我喺美國返學嘅話我可能會著避彈衣。
龜：「黑桃…女王，終於約到妳出嚟…實在太好。」
其實我初初都覺得呢個名有啲繞口巉手，明明嗰隻牌我哋係叫開做葵扇Q（女），但啲宅男好似好快就適應到。