【代糖故系列】《她被寄宿到屋邨男孩的家中》: K509

放低咗我哋之後管家當然要泊車，不過好似話佢今日有嘢做所以就唔上嚟一齊玩，對我哋嚟講都算係好事嚟嘅；而星期日嘅gym room大家都應該有所理解，十部機上面有八部係有人嘅，但係都無辦法，除非有錢女喺自己屋企整間健身室啦，不過佢屋企人就似乎無乜興趣。
最攪笑係佢哋去到邊部機隔籬，啲哥哥物體就會好熱情咁讓位畀佢哋，係咪見到自己啲手汗俾女神掂到都會興奮？至於我…都係留返平日夜一夜嗰陣先嚟享受啦，咁嘅環境同公眾泳池無乜分別，始終唔太貴嘛，唯有攞兩個啞鈴坐喺度舉下算。
假日都會有啲色途老馬嘅哥哥姐姐喺度social下咁…其實呢句廢話嚟，因為正常嘅gym room有幾可會見到我哋呢啲中學生喎…啲哥哥著住件緊身背心盡show肌肉線條，而啲姐姐就明明喺陸地都著到好似比堅尼咁，我無乜興趣探討佢哋乜關係，反正我唔會有得睇佢哋下一場去邊，不過好多都會留意下兩位女神然後就有講有笑，至於佢兩個就真係可能慣晒畀人望住，唔覺得佢哋會唔自然。
而女仔呢種生物呢，係進行任何事情都要影相嘅…我想象唔到一個港女如果返到去未有數碼相嘅年代可以點生存，隨時食餐飯都無咗兩筒菲林，莫講話出去玩。
我：「妳兩個拍到咁埋影驚唔驚兩部單車機炒車…」
Q：「舉你嘅鐵啦，咁多嘢講小心不舉呀。」惡毒得妳…
V：「嘻嘻，我要影相畀我爹地睇交差呀。」
我：「原來係咁…放心啦，我唔會入鏡嘅。」
其實妳哋兩個自己嚟都得啦，何必邀請埋我呢…不過諗深一層，會唔會係想我保護佢哋呢，至少我喺附近就的確好似無人會埋嚟撩佢哋咁；是但啦，兩位女神其實無論叫我做乜我都唔會反抗，何況而家兩位一體。
玩咗個零鐘頭已經夠晒皮，而人流係絕對無少到，所以我哋決定沖涼走人，本來以為幽蘭會即刻call管家嚟接佢，不過佢又跟埋QQ入去沖，嗯，唔關我事…今日個場真係爆到，我都要等咗五分鐘先有沖涼格。




沖完出到去唔見佢哋，正常，不過管家就上咗嚟接佢…
我：「欸…今日都幾多人下，可能要等多陣。」
管：「預咗啦，呢啲平民gym room管理得好，放假就實多人，係呢，大小姐佢玩得開唔開心呀？」佢坐喺度一路講，兩隻手各攞住一個十kilo喺度拉推，好似做柔軟體操咁定同輕鬆，面部表情氣定神閒…
我：「開心呀，感覺佢兩個喺埋一齊就乜煩惱都無晒。」
管：「咁就好，希望小姐佢以後都係咁，我諗到佢大學畢業嗰陣，我就終於可以退休。」
我：「即係重有七年左右？咁快就退休嗱？」
管：「唔算快喇，同法定退休年齡已經差唔多。」我屈指一算…其實呢啲係小學低B數嚟，計到佢五十八左右。