【士㞗彈系列】《她被寄宿到鹽水男孩的家中》2K15中: K792

點解咁嘅傻仔有權利幸福？雖然我似乎無權喺度呻。
Q：「喂，你喺度瞓大覺！乜做晒功課嗱？」
我：「咦，係喎，一樣功課都未做過…」死死地起返身。
Q：「真係睇少你一陣都唔得，剩係識同女女玩。」
我：「邊係玩喎，只係奉命去陪下佢哋咋嘛。」
Q：「嘩，好委屈你喎，知唔知有幾多男仔想陪下女神佢哋都無機會呀，係嘅，你陪女女玩剩係得嗰味嘅啫。」
我：「唔係嘅…最可惜係我對音樂一竅不通。」
Q：「你使鬼識音樂，你知佢哋諗緊乜就得㗎啦，快啲攞功課出嚟呀，唔想攪到三更半夜先瞓。」
其實我又點會知妳哋諗緊乜，全部都喺度玩緊我。
攞完啲功課出嚟，QQ除咗套校服，今日嘅佢著住少見嘅上下純白，其實我今朝先睇過嚟。




我：「女神大人，妳諗住著到咁做功課呀？」
Q：「做一陣先啦，費事你啱啱睇住我拍完拖，自己就一個人心理唔平衡呀。」乜女神妳有讀心術㗎？
我：「妳咁少布唔會凍咩？」
Q：「香港十一月有幾凍呀，啱啱行返嚟好熱。」
我：「未至於唔平衡嘅，妳係女神嚟，有男朋友是應該的，無先奇怪。」
Q：「乜你重想拍拖㗎咩，已經日日咁多女圍住你。」
我：「想㗎…唔同嘛，兩個人一齊嘅感覺係好幸福的。」
Q：「你可以㗎，Flora都唔差吖，唔試下？你唔好下下都話我阻住你呀，最多係攪到你無咗間扑嘢屋啫，你正正常常喺出面識女仔拍拖我係唔會理你嘅。」
我：「欸…其實我有諗過，咁樣同個女仔喺埋一齊係咪好…想就梗係想有個女仔喺身邊啦，又或者滿足一下自己嘅慾望，但咁嘅話同以前識細蚊有乜分別喎，都唔會諗住一生一世㗎啦，好似利用咗人哋嘅好意咁。」
Q：「吖，你份人真係極端嘅啫，無人叫你第一日就食咗人哋呀…如果人哋對你有意思，可以先互相認識下嘅啫，你唔係聖人嚟諗到愛情咁高尚做乜，呢個世界唔係話要乜嘢絕對無私奉獻先叫愛㗎，可能你對佢有好感，可能係有需要，或者只係你欣賞人哋嘅外表某程度上都已經算係愛㗎喇。」




我：「標準咁低嘅話得唔得㗎？」
Q：「無話得唔得，我都唔會諗住嫁畀條仔㗎啦，咪又係咁一齊，呢啲嘢自行調節嘅啫。」
我：「點解唔會諗住嫁畀佢，係咪佢有乜唔好？」
Q：「又唔係…有乜唔好嘅，只不過係睇唔到可能性囉，或者佢無辦法令我心動，而我又唔需要諗呢啲咁長遠嘅嘢住。」有能力又聰明嘅女仔實在係太恐怖，相比之下就算以前我對細蚊好差，佢都講過話想嫁畀我，然後希望我照顧佢成世。