【士㞗彈系列】《她被寄宿到鹽水男孩的家中》2K15中: K822

食完tea過咗陣，佢嘅老師就嚟到，原來係一個靚女大學生姐姐，果然物以類聚…靚過欣姐同貞姐唔使講，比較屬於正統系靚女，頭髮係斯文嘅過肩中髮齊cut，比起QQ長幾吋咁，採傳統王道女主角分界，髮尾六成有挑染漸層金，上身粟子奶茶兩層衫，下身一條白色透紗不及膝兩層裙，腳著黑色低筒靴…重點係淺藍色底底。
Q：「呢位係Cindy姐姐，佢叫阿爽，順便嚟溫書嘅。」
我：「Cindy妳好，多多指教。」
C：「阿爽你好，要勤力啲溫書喇。」
講真，呢個Miss係幾鬼靚下，如果細返幾年應該可以直接撼贏易汪同天王星，不過…佢嘅氣場就實在係比較普通嘞，我又唔係特別鍾意姐姐，做得姐姐就應該要好似卡車同欣姐咁黐線…雖然我知自己有認知障礙。
迫於無奈之下，唯有計數計數再計數，靚女又點吖，就算幽蘭喺身邊我都未必感受到快樂，何況重有教科書；而佢兩個嘅對話，就完全係關於溫書技巧同啲考點，睇嚟QQ都計過度過，唔係叫佢逐課逐課教。
嗯…論Miss嘅話，仍然係詩敏Miss完勝，好難解釋。
Q：「欸…唔好意思…我要行開一陣，好快返嚟。」唔通係今朝啲早餐唔乾淨？再加做gym磴晒落條直腸度。
雖然QQ唔喺度，但由於我一蚊都無課過，當然唔會打攪姐姐，就連昅佢都唔會，因為有違商務關係守則。
C：「喂，仆街仔。」吓，我無聽錯掛，粗口？




雖然佢個款未至於Zilvia嗰啲乖女，但總算係個斯文大學生姐姐，定係我真係仆街到額頭印住呢兩粒字？
我：「對唔住，我有溫書㗎…定係我錯得太離譜？」
C：「你睇下你，連啲等號都唔對嘅，想睇死改嗰個咩…」
我：「因為左邊無晒位吖嘛，我擦咗佢囉。」一般嚟講，通常我係睬佢都有味，鬼叫佢係靚女大姐姐咩。
C：「喂，你隻嘢真係唔認得我㗎？」
我望住佢滿頭問號，照計呢個樣咁靚女我無理由唔認得吖，就算Angel同貞姐我都係化咗灰一樣認得，呢個…唔通係我好細個識落嘅姐姐嚟？但佢又點解會認得我呢，定係只係認得我呢個咁特別嘅名？
我：「欸…唔認得…如果有啲乜曾經得罪請多多包涵，希望妳可以大人不記小人過。」但願佢唔係我拆爛街邊單車或者整到窗台成地BB彈嘅受害者。
C：「頂你吖，我係泳池姐姐嚟呀！」
我：「泳池…鬧我昅嘢然後串柒柒嗰個姐姐？」
C：「係呀，喫蕉啦你，咁都唔認得。」




我：「欸…靚女咗嘛，無咗沒鏡，而且頭髮唔同咗色。」
C：「算你啦，重識得讚返我，其實除咗認得你隻死嘢牛高馬大之外都唔係好認得你，但我絕對認得個女仔。」