【士㞗彈系列】《她被寄宿到鹽水男孩的家中》2K15中: K823

我：「係嘅，佢咁靚女，嗰日又啱啱落水…呀，係呀，其實佢唔係我女朋友嚟㗎，拜託妳唔好亂講嘢。」
C：「估到啦，喺度扮晒蟹，佢咁靚女使乜揀到你。」
我：「乜都好啦，唔緊要，但佢係我嘅好好好朋友嚟。」
C：「陰功，做唔到普通朋友嘅傻仔。」呀，呢個姐姐除咗串柒柒之外重幾特別，又會識呢啲梗嘅。
我：「嗰次之後我重去游過幾次水，可惜撞唔到妳。」
C：「正常吖，之後我應該無去過嚕，直到開學。」
我：「撞過妳兩次，重以為妳好鍾意游水成日去練。」
C：「唔係噃，只係嗰陣無拖拍放假太得閒咪搵啲嘢做，一個人游水幾好吖，又可以睇下啲傻仔點昅我。」
我：「姐姐妳都幾爆㗎喎…同埋恭喜妳而家唔使游水，雖然已經換季得返個室內池，但我唔使去撞妳嚕。」
C：「做乜呀，妳好想撞到我咩？」




我：「咁，我覺得妳幾得意吖，同埋又靚女。」
C：「你唔係成日見到妳好好好朋友咩，重使唔使嚟撞我呀，同佢去玩水都夠晒啦。」
我：「咁靚女無人嫌多嘅，妳同佢又唔係同一類。」
C：「多謝你讚我喎，不過我可能就嚟又要去游水。」
我：「呀…sorry…雖然…其實只係過咗幾個月，咁快嘅？」
C：「唔係吖，幾個月算長㗎喇，應該入到頭五。」
我：「咁…會唔會唔係幾好，雖然我唔會質疑妳濫。」
C：「傻仔，有時該認真就認真，該濫時就濫，就好似你讀書咁，都唔會搏到盡科科打分啦，有啲選收應棄則棄，攞個合格咪算，免得累到全盤三玩死自己。」
我：「咁…係咪可以搵個最值得認真嘅，嘥少啲時間？」
C：「咁易咩，有時你以為應該要認真，但發覺唔係嗰一回事，而絕對要認真嗰啲，又未必輪到你…總之，騎牛搵馬係比較效益最大化，你諗下啦，有時有個仆街仔可以陪下你，都好過自己一個嘅，最緊要唔好太沉攪到受晒傷咪得，你咪又係，食唔到好朋友就走嚟昅我，曳！」




我：「咁我認曳嘅，所以佢唔會同我一齊都好正常，但係佢對我好好㗎，所以我好尊敬佢…但調轉嚟講，如果玩玩下有幾個月真係算長喎，做乜等到而家先嚟散。」
C：「咪又係咁，覺得佢唔再惜我囉，對咗幾個月就會開始悶，男人始終係貪新鮮嘅動物。」