【士㞗彈系列】《她被寄宿到鹽水男孩的家中》2K15中: K845

我：「大小姐，何以見得買炭乃係一件有趣之事呢？」
V：「因為未買過，剩係聽人燒炭先會去買炭。」
我：「呀，拜託妳唔好諗埋啲古怪嘢，跟我哋嚟就可以喇…但妳天台有燒烤爐㗎，唔使買炭㗎咩？」
V：「咁唔方便，嗰嚿嘢用石油氣㗎。」佢似乎覺得我哋係原始人嚟，但偏偏就好鍾意嚟玩。
我：「明嘅，攪到成鑊炭屎的確好難處理。」
如是者，佢就跟住我同肥豬同健仔去買炭；一般而言，呢啲首席女神跟住我哋幾個平民行係會比較礙眼，但我哋班已經習慣晒我呢隻生物經常女神在身邊，已不以為然。
我哋班人頭三十有多，事前已經夾過大概分成五組，當中嘅人事問題就先暫且不提；五個爐嘅話，每個爐通常需要一包炭以上但又用唔晒兩包炭，所以我哋係要買八包。
豬：「記住買埋你自己呀，如果唔係聽日無叉用就好笑。」好笑，未驚過，燒烤場周度都係廢置燒烤叉，洗兩洗就一條好漢嚟啦。
健：「欸，記住買埋女人至愛呀。」佢指住包炭精。
喂，你噏乜春廢話呀，佢唔係Q同Y嚟㗎。




V：「啊，點解呢包嘢會係我哋至愛呀？」果然乖女…
我：「啊，因為香港女仔多數都透唔到爐，但有咗呢包嘢之後就會起到火，所以妳哋咪鍾意用囉。」
V：「原來係咁，好在我屋企㩒個制就會有火。」
我：「邊使另外買㗎，買蜜糖咪有得送囉。」雖然件事係好合理，但唔太明點解呢兩樣嘢一定要綁埋一齊賣。
V：「得唔得㗎，呢邊啲澳洲蜂蜜好似靚啲喎。」點解唔係買開嘢嘅佢一睇就知靚啲？因為廿幾蚊同七十幾蚊…
我終於明白佢點解一定要送炭精，就係為免你哋班友買更加靚嘅蜜糖，而我亦相信幽蘭屋企BBQ實係用齊各式各樣嘅靚調味料，諗諗下又諗起嗰次船P…
豬：「唔關靚唔靚事，呢啲係風味嘅問題。」
呢句我同意呀，就算幽蘭靚到鬼火咁，論風味都係比唔上Angel姐姐，甚至乎係韻婷。
V：「嘩，呢度都有好多bless果汁呀，原來枝枝唔同價錢。」呢個女仔究竟有幾鍾意研究平民…
我：「唔好睇喇，妳屋企成lot訂都唔同價錢㗎啦，我哋買完嘢要搦返學校，跟住打牌。」兩手空空嘅佢，又點會體諒到搦住兩三包炭嘅我哋嘅心情。




V：「呀，你可以畀幾枝叉我拎㗎。」
我：「喂…唔好搶啦，會散㗎，埋完單先分啲畀妳。」
胡鬧嘅學生超市購物之旅暫且完結，幾隻手指都紅晒。
豬：「咁叉仔你執返好啲嘢然後鎖門喇，我上去先。」
V：「呀，我突然想去廁所，交叉仔喺Lab等啦。」
健：「咁你加油喇，我行先。」你哋幾丁友吖，雖然只係要將啲炭放埋一二邊同埋札起啲叉啫。